NCAA бол яг цэвэр өрсөлдөөн, спорт талаасаа NBA-с илүү гэхэд болно. Өнөөдөр NCAA-ын аваргын төлөөх тоглолт Индианаполист болж, талбайн эзэн Батлерийн багийг Дюкийн баг 2 онооны зөрүүгээр хожсоноор 5 дахь удаагаа үндэсний аваргаар тодорлоо. Аваргын төлөө тоглолт  2 буюу түүнээс доош оноогоор шийдэгдсэн 11 дэх тохиолдол нь өнөөдөр болсон байна. 1989 онд Мичиган болон Сетон Халлийн тоглолт 80:79-өөр дууссанаас хойш хамгийн бага зөрүүгээр өндөрлөсөн финал нь өнөөдрийнх болсон.

Ордонд цугласан 70 000 үзэгчийн ихэнх нь Батлерийн Их сургуулийн багийг дэмжиж байсан нь тодорхой. Тоглолтын ялагч сүүлийн хонх дуугартал тодорхой бус байлаа. Тоо 60:59, Дюк илүү байхад Батлерийн багийн Гордон Хэйвордийн шидэлт оновчгүй болж, Бриан Зубек самбараас авсан. Түүн дээр Батлерийн баг тэр даруй алдаа хийсэн, тоглолт дуусахад 3.6 секунд үлдээд байв. Зубек торгуулийн 2 дахь шидэлтээ санаатай алдсан бөгөөд завсарлага авах боломжгүй тул багахан хугацаанд Батлер амжиж довтолж, мөнөөх Гордон Хэйворд талбайн бараг төвөөс бөмбөгийг шидсэн ба оновчгүй болжээ. Уг нь самбарт ойгоод орох дөхсөн. Хэрэв шидэлт оновчтой болсон бол ордонд цугласан үзэгчид Батлерийн спортын түүхэн дэх хамгийн гайхамшигт агшны хамгийн азтай гэрчүүд болох байв.

Дюкийн баг, мөн алдарт дасгалжуулагч Майк Шишевскигийн (Coach “K”) 4 дэх түрүү нь энэ бөгөөд 2001 оноос хойш түрүүлээгүй байв. “Хамгийн түрүүнд хэлэх зүйл бол энэ үнэхээр гайхамшигтай сагсан бөмбөгийн тоглолт байлаа. Би гайхалтай Батлерийн баг, тэдний хөгжөөн дэмжигчдэд баяр хүргэхийг хүсэж байна. Үнэхээр сайхан улирал. Бид сайн тоглосон, тэд сайн тоглосон. Аль аль баг нь, бүх залуучууд сэтгэл зүрхнээсээ тоглосон. Ямар нэг зүйл хэлэхэд хэцүү байна, үндэсний аварга болсон гэж төсөөлөхөөр” гэж коач К хэлжээ.

Дюкээс олон түрүүлсэн баг 4 байдаг бөгөөд UCLA, Кентаки, Индиана болон Хойд Каролинагийн багууд Дюкийн өмнө бичигддэг гэнэ.

Финал 4-ийн шилдэг тоглогчоор аварга багийн Кайл Синглер тодорсон бөгөөд тэрээр сүүлийн 15 жилд уг шагналыг хүртсэн тоглогчдоос 20+ оноо, 9+ самбараас авсан 4 дэх тоглогч болов.

Дюкийн баг одоогийн хамгийн авьяаслаг баг биш боловч сайн хамгаалалт, сайн зохион байгуулалт болон бие бялдрын сайн бэлтгэлжилтийнхээ ачаар ийн аваргаллаа.

NCAA. Финал
«Дьюк» – «Батлер» – 61:59 (33:32, 28:27)
Д: Синлер (19), Скейер (15), Смит (13)
Б: Хэйворд (12), Мэк (12), Ховард (11)