Мотоциклийн бартаат замын Азийн аварга шал гаруулах цуврал тэмцээний хоёр дахь шатны уралдаан өчигдөр Филиппиний Манилад боллоо. Тус уралдаанд манай улсаас гурван тамирчин оролцжээ.

Тэмцээний 125 см3 ангилалд хурд сорьсон ОУХМ Э.Халиунболд эхний гараандаа хоёр, удаах гараанд тавдугаар байр эзэлж, нийлбэр дүнгээр гуравдугаар байрт шалгарав. Тэрбээр уралдааны өмнө зүүн хөлдөө гэмтэл авсан ч ийн шагналын тавцанд гарч чаджээ. Тэрчлэн, ОУХМ Б.Ган-Од эхний гараанд хоёр, удаахад нь зургадугаар байр эзэллээ.

Харин залуу тамирчин Э.Баяржаргалын хэрхэн уралдсан талаарх дүн мэдээ хараахан ирээгүй байна. Тэмцээний дараагийн гараа тавдугаар сард БНХАУ-д болох ажээ.