“Сан-Антонио” – “Даллас” – 97:87 (22:8, 25:26, 23:29, 27:24)

С: Жинобили – 26. Ж. Хилл – 21. Данкан – 17 + 10 самбар.

Д: Новицки – 33. Кэр. Батлер – 25.

Цувралын харьцаа – 4:2.

Сан Антионо Спэрс өнөөдөр талбай дээрээ Даллас Мавериксийг 10 онооны зөрүүтэй хожсоноор цувралд 4:2-оор тэргүүлж дараагийн шатанд шалгарлаа.

Эхний шатанд түрүүлж 4 хожсон нь 2-р шатанд шалгардаг болсноос хойш анх удаа 7-оор гарсан баг нь 2-оор гарсан багаа мулталж байгаа нь энэ. Өмнө нь эхний шатыг 3 хожлоор шийддэг байхад ийм тохиолдлууд гарч байсан аж.

Хамгийн сүүлд л гэхэд 199 онд Никс Хитийг 3:2-оор хожиж шуугиан тарьж байв.

Далласын хувьд Кэрон Батлер, Брэндон Хэйвуд нарын солилцооноос хойш тун сайн тоглож, бүсдээ 2-р байраар плей-оффт орсон ч эхний шатыг ч давалгүй хасагдлаа. Харамсалтай л юм. Ер нь Даллас, Дирк плей-оффт азгүй юм аа. Өмнө нь 2007 онд 1-ээр гараад 8-аар гарсан Голден Стэйтэд хүртэл хожигдож байсан. Тэд сүүлийн 4 улиралд 3 дахь удаагаа эхний шатнаас хасагдлаа. Уг нь Даллас улирлын тоглолтуудад дандаа сайн тоглодог, 10 улирал дараалан 10+ хожил авсан ч плей-оффт л явахгүй юм. 2006 оны финалд үлдсэн ч 2:0-ээр хожиж байгаад дараалан 4 хожигдож байсан удаа ч бий.

Даллас энэ улиралд НБА-ын хамгийн шилдэг зочлон тоглолтын амжилт үзүүлсэн ч плей-оффт Спэрсийн талбайд 3 тоглоод 3 хожигдлоо.

Марк Кубан улирлын дундуур хийсэн солилцооны улмаас нэмж 30 сая доллар гаргасан ч энэ мөнгө салхинд.

Дирк Новицки энэ зун чөлөөт агент болох боломжтой. Тэр энэ эрхээ эдлэхгүй байх магадлал өндөр ч юу ч болоо билээ, харж л байя.

Спэрс тоглолтын эхнээс л давамгайлж, эхний хагаст 22 хүртэл оноогоор тэргүүлж байлаа. Харин 2-р хагаст Дирк Новицки нийт 25 оноо авч, Даллас оноог барьсан. 3-р үеийн дунд Диркийн 3 онооны шидэлт оновчтой болсноор тоо 57:56, Даллас 1 оноо илүү болсон юм. Гэвч Спэрст Данкан, Ману, Паркераас гадна бас нэгэн сайн тоглогч байгаа аж. Тэр нь Жорж Хилл. 4 дэх тоглолтын баатар Хилл энэ удаа 4-р үед 10 оноо авч, Далласыг мултлахад томоохон үүрэг гүйцэтгэсэн байна.4-р үед олон оноо авснаас гадна Хилл эхний хагаст Диркийг 2 ч удаа алдаа гаргуулж, улмаар 4 алдаатай болгон нөөцийн сандал руу удаан хугацаанд үдэж дөнгөсөн юм.

“Портленд” – “Финикс” – 90:99 (17:24, 24:29, 24:21, 25:25)

П: Уэбстер – 19. Олдриж – 16 + 9 самбар. Фернандес – 16.

Ф: Ричардсон – 28. Стаудмайер – 22. Дадли – 12.

Цувралын харьцаа – 2:4.

Спэрстэй өрсөлдөх баг ч тодорлоо. Портлэндэд болсон цувралын 6 дахь тоглолтонд Санс 9 онооны илүүгээр хожиж, бүсийн хагас шигшээд шалгарав. Жейсон Ричардсон 28 оноо авч багаа тэргүүлсэн бөгөөд Амаре 22 оноогоор удаалжээ. Санс 2007 онд бүсийн хагас шигшээд үлдээд Спэрст, 2008 онд эхний шатанд Спэрст тус тус хожигдож байлаа. Тиймээс Сансын хувьд хариугаа авах цуврал болох нь.

Портлэнд ийнхүү плей-оффийн 6 цувралд дараалан хожигдлоо.

Санс эхний хагасыг 12 онооны илүүгээр дуусгасан. Гэхдээ 4-р үед Портлэнд тоог 76:76 болгож тэнцүүлсэн ч үүнээс цааш Санс дахин оноогоор давамгайлж улмаар тоглолт дуустал үүнийгээ хадгалж чадав.

Портлэндээс Уэбстэр хамгийн олон буюу 19 оноо авсан бөгөөд энэ цувралд анх удаа гараанд гарсан Рой харьцангуй бага 14 оноо авчээ. Рой  уг нь энэ цувралыг өнжинө гэж байсан ч тоглосон. Гэвч багтаа төдийлөн тус болж чадсангүй.

Ер нь Портлэндийн энэ улирал ингээд дүүрэн гэмтэл бэртлийн дунд  өрнөж, улмаар дууслаа. Харин ч тэд өрсөлдөөн ширүүн Өрнөд бүсэд плей-ффт үлдсэн нь, тэгэхдээ бүр 6-аар гарч чадсан нь олзуурхмаар амжилт юм. Энэ амжилтыг дасгалжуулагч Нэйт МакМиллиантай шууд холбож ойлгох хэрэгтэй болов уу.