Тайрак Эванс 2009-2010 оны шилдэг шинэ тоглогчийн шагналыг хүртлээ. Эвансийн нэрийг Америк, Канадын 123 спортын сэтгүүлчдийн 67 нь оны шилдэг шинэ тоглогч гэж нэрлэсэн бөгөөд  Голден Стэйтийн хамгаалагч Стифен Карриг 43 удаа тэргүүнд нэрлэсэн байна. Эванс нийт 491 оноо авсан бол Карри түүнээс 100-аар цөөн оноо авсан болно.

Эвансийг Кингз өнгөрсөн зун драфтын номер 4-өөр авсан бөгөөд тэрээр багийнхаа  тоглогчдыг дундаж 20.1 оноогоор тэргүүлж, 5.8 оновчтой, 5.3 самбараас авалт хийж байлаа. Эвансийн гол амжилт бол Оскар Робертсон, Майкл Жордан, ЛеБрон Жэймс гэсэн НБА-ын 3 агуу тоглогчдын нэгэн адил шинэ тоглогчийн улиралдаа 20+ оноо, 5+ оновчтой дамжуулалт, 5+ самбараас авалт хийсэн явдал юм.

5.8 оновчтой дамжуулалт нь шинэ тоглогчид дундаа 2-т, 37.2 минут нь 1-т, 1.51 бөмбөг таслалт нь 2-т тус тус орохоор үзүүлэлт гэнэ.

Эванс энэ улиралд 20+ оноог 41 удаа авч, шинэ тоглогчдоо тэргүүлсний дээр Кингзийн шинэ тоглогчдын түүхэнд хамгийн олон удаа 20+ оноо авсан тоглогч болжээ.

Эванс Бүх оддын тоглолтын дундуур болдог Шинэ тоглогчид – 2 дахь жилдээ тоглож буй тоглогчдын хоорондох тоглолтын MVP болж байв.

Эванс шагнал авсныхаа дараа хэлэхдээ:

“Би бараг 400-аад цом шагнал авч байсан. Даанч маш олныг нь алга болгож, бас эвдэлж хагалж байлаа.  Манай ээж санамсаргүйгээс болоод олныг хагалсан. Дараа нь тэр эвлүүлээд наахыг оролддог ч нэгэнт оройтсон байдаг тул яах ч аргагүй. Харин хамгийн чухал шагналуудаа бол шилэн хоргонд хийдэг”

“Би НБА-д орж ирэхдээ энэ шагналыг авна гэсэн зорилго тавьж байсан. Энэ биелсэнд бахархаж байна. Би бага байхаасаа л үүнийг мөрөөддөг байсан. Миний мөрөөдөл ингэж биеллээ” гэжээ.

Харин дэд байранд орсон Карри: “Тайракт баяр хүргэе. Тэр энэ шагналыг эргэлзээгүй авах эрхтэй. Миний хувьд 2-т орсон нь миний сайхан кареерийн гайхалтай эхлэл” гэсэн байна.

Шинэ тоглогчдын шагнал нь Эдди Готтлиебийн нэрэмжит бөгөөд тэрээр 1946-47 оны улиралд Филадельфи Уириорзийг удирдаж НБА-ын аварга болж байжээ.

-