Сан-Антонио – Финикс – 96:110 (28:19, 22:25, 22:27, 24:39)
СА: Жинобили (27), Данкан (15+13 самбар), Макдисс (12+10 самбар)
Ф: Драгич (26), Ричардсон (21), Хилл (18)
Цувралын харьцаа: 0-3

Спэрс Сансыг плей-оффоос олон удаа мулталж байсан. Харин энэ удаа Санс хожих бололтой. Цувралын 3 дахь тоглолтыг Спэрс өөрийн талбайдаа хийсэн ч хожиж чадсангүй. Хожигдсон шалтгаан нь Спэрс 4-р үед нэг тоглогчийг хамгаалж чадаагүйгээс. Тэр хамгаалж чадаагүй тоглогч нь Нэш биш. Амаре ч биш. Амаре 4-р үед бүр огт талбайд гараагүй. Жейсон Ричардсон ч 4-р үед талбайд гараагүй. Тэр Спэрсийг сүйд хийсэн нөхөр нь Горан Драгич. Сансын нөөц тоглогч тэрээр 4-р үед ганцаараа тоглож, 23 оноо авснаар Санс энэ цувралыг шийдсэн гэж хэлж болох хожил авлаа.

“Плей-оффийн тоглолт дахь миний харсан хамгийн гайхалтай 4-р үеийг тэр бүтээлээ” гэж Грант Хилл хэлж. Үнэхээр ч түүхэн дэх хамгийн шилдэг 4-р үеийн үзүүлэлтийн нэгийг Драгич хийсэн.

3-р үе дуусахаас 3 минутын өмнө Санс гол тоглогчдоо амрааж, нөөц тоглогчдоо оруулсан. Ер нь нөөц тоглогчид 4-р үеийн эхний 3-4 минутыг өнгөрөөчхөөд эргээд суудаг. Гэтэл Драгич 4-р үеийн тэрхүү багахан хугацаанд удаа дараалан оновчтой довтолж, баг нь анх удаа оноогоор илүү гарсан тул Алвин Жентри нөөц тоглогчдоо талбайд дахиад хэсэг хугацаанд үлдээсэн. Энэ нь ч зөвдөж өнөөх Драгич шидсэн бүрээ оновчтой болгож, бүр 3-аас алдаатай хийж, Сансын давамгайлал улам нэмэгдэв. Тэрээр 4-р үед нийт 11 довтолж, 9-ийг нь оновчтой болгожээ.

“Тэр миний нууц зэвсэг” гэж Жентри тоглолтын дараа хэлж. Драгич улиралд 7.9 оноо, энэ плей-оффт 5.6 оноо дунджаар авч байсан ч өнөөдөр ингэж тэсэрнэ гэж хэн мэдэхэв.

Спэрс 3-р үеийн дунд 7-8 онооны давуутай байсан ч үе дуусахад 1 онооны л тэргүүлэлтэй үлдсэн. Улмаар 4-р үед өрсөлдөгчдөө 39 оноо алдсанаар цувралыг 0:3 болгож байна. НБА-ын плей-оффийн түүхэнд нэг ч баг 0:3-аас дараалан 4 хожиж цувралд хожиж байсан удаагүй.

Грег Попович өнөөдөр Тони Паркерийг гараанд гаргаж, Жорж Хиллийг нөөц болгосон. Хилл 1-р сараас хойш 46 тоглолт дараалан гарааны бүрэлдэхүүнд байсны эцэст сэлгээнээс тоглолтонд оролцсон бол Паркер энэ плей-оффт дандаа нөөц тоглогчоор тоглож байсан. Паркер Сансын эсрэг эхний 2 тоглолтонд дунджаар 23 оноо авсан байсан бол өнөөдөр гараанд гарахдаа ердөө 10 оноо авчээ. Мөн Данкан, Паркер нар торгуулийн 16 шидэлтийнхээ 11-ийг нь алдсан, Ричард Жефферсон нийт 9 довтолж, ганцыг нь оновчой болгосон зэрэг базаахгүй статистикууд байгаа.

Гэхдээ Спэрсийн өнөөдрийн хожигдлын гол шалтгаан нь ерөөсөө л Драгичийн гайхалтай тоглолт. Өөр юу ч хэлэхэв. Уг нь Амаре ердөө 7-хон оноо авч, тун муу тоглоод байсан ч Спэрс ашиглаж чадсангүй дээ.