Английн шигшээ багийн мэргэжилтнүүд Гарет Барри 4 долоо хоногийн дотор эдгэрч формондоо орж чадахгүй гэдгийг мэдэгдсэн тул түүний оронд дэлхийн аваргад явах тоглогчийг Капелло хайх хэрэгтэй болоод байна.

Их Британий хэвлэлүүдийн мэдээлж байгаагаар энэ тоглогч нь МанЮ-гийн Овен Харгривз байж магадгүй байна. Харго өнгөрсөн долоо хоногт Сандерлэндийг 1 : 0-ээр ялсан тоглолтонд удаан хугацааны бэртлээсээ эргэн ирж 20 секундыг талбай дээр өнгөрүүлсэн.

Хэрвээ тэр ДАШТ-д оролцох бүрэлдэхүүнд багтах юм бол Английн хөлбөмбөгийн түүхэн дэх хамгийн дуулиантай эргэн ирэлт болох боломжтой.
Шагайгаа бэртээсэн Барригийн бэртлийг 4 долоо хоногийн дотор эдгэрнэ гэж байсан ч нарийн шинжилгээгээр 7 долоо хоногоос наашгүй болох нь илэрсэн байгаа. Тиймээс ДАШТ-ий бүрэлдэхүүнд багтах 30 тоглогчийн нэгээр Овен явах болж байх шиг байна. Овен 2008 оны 9 сард Челситэй хийсэн тоглолтонд маш хүнд бэртэл авч бараг 20 гаран сар хөлбөмбөг тоглож чадаагүй бөгөөд энэ хугацаанд нийт 113  тоглолтыг өнжжээ.