“Сан-Антонио” – “Финикс” – 101:107 (25:19, 22:31, 24:22, 30:35)

С: Паркер – 22. Данкан – 17 + 8 самбар. Ж. Хилл – 17.

Ф: Стадамайр – 29. Нэш – 20 + 9 дамжуулалт. Дадли – 16.

Цувралын харьцаа – 0:4.

Санс 7 оноогоор тэргүүлж байхад буюу 3-р үеийн дунд Тим Данканы тохойнд өртөж, нүд рүү гээ цохиулсны улмаас Стив Нэш талбайг орхисон бөгөөд үүнээс хойш Спэрсийн тоглолт сэргэж, Сансых муудаж тоог үе дуусахаас өмнө тэнцүүлж чадсан. Гэвч 4-р үед Нэш эргэн ирээд нийт авсан 20 онооныхоо 10-ыг нь авч, Санс Спэрсийг хожсоноор цувралыг 4:0-ээр дуусгалаа. Эхний шатанд Мавериксийг хожсон Спэрсээс олон баг эмээж байсан, Санс – Спэрсийн цувралын ялах магадлалтай баг нь Спэрс гэгдэж байсан ч тийм зүйл болсонгүй. Бүр 0:4-өөр хожигдоно гэж хэн санахав.

2003 оноос хойш плей-оффт эдгээр багууд 4 дэхээ таарч байгаа бөгөөд дандаа л Спэрс хожиж байв. Тиймээс Санс удаан хүлээсэн хариугаа авлаа гэж болно.

2007 оны плей-оффт эдгээр багууд тоглоход Нэш Паркер нар мөргөлдөж, Нэшийн хамраас их хэмжээний цус гарч байсан бөгөөд уг цувралд Санс хожигдож байлаа. Өнөөдрийн тоглолтонд ч Нэш Данканд баруун нүдээ тохойдуулан цусаа “урсгасан” ч 2007 оныхоос ялгаатай нь цувралд Санс хожив.

“Тэр Ray ‘Boom Boom’ Mancini шиг харагдаж байсан. Түүнийг ажиглахад бараг л нэг нүдээрээ л харж шидэж байсан” гэж Нэшийн тухай багийн анд Грант Хилл нь хэлж.

“Мэдээж бид хожигдсонд миний сэтгэл их муу байна. Гэвч би Нэш, Амаре нарын өмнөөс баярлаж байна. Учир нь тэд байнга л бидний эсрэг ширүүн өрсөлддөг байсан ч ялж байгаагүй. Харин энэ жил яллаа” гэж Тони Паркер хэлжээ.

Өмнөх тоглолтонд муу тоглосон Амаре өнөөдөр алдаагаа засч 29 оноогоор бүх тоглогчдыг тэргүүлсэн юм. Амаре бол Спэрст сүүлийн 7 жилд плей-оффт 3 хожигдоход 3-ууланд нь Сансын бүрэлдэхүүнд байсан ганц тоглогч юм. Гэхдээ л өнөөдөр хожиж чадлаа.

Спэрс түүхэндээ 3 дахь удаагаа л 4:0-дүүлж байгаа бөгөөд 1982, 2001 онд тэднийг цэвэр хожсон Лейкерс тухайн жилүүддээ аварга болж байв.

Тони Паркер энэ зун гэрээгээ шинэчилж магадгүй, гэхдээ Спэрс түүнд их мөнгө амлахгүй л болов уу. Жорж Хилл гэх залуу түүнийг хангалттай орлож чадах нь харагдсан.  Жинобили ирэх жил 33 хүрнэ, 3 жилээр гэрээгээ сунгасан. Данкан 2012 оны улирал дуустал гэрээтэй, тэр үед 35 хүрнэ. Спэрс ирэх 2 жилдээ плей-оффт үлдэх л байх. Эхний шатыг ч давж болох л юм. Гэхдээ л яг энэ байдлаараа бол дахин аварга болох нь юу л бол. Робинсоныг харьж явах үед залуу Данканыг авч, “Ихэр цамхаг” 2 ч удаа аварга болсон. Дараа нь Робинсоныг зодог тайлсны дараа Данканы хүчээр нэг, Данканд Паркер, Ману маш сайн тусалж бас нэг, нийт 4 удаа аварга болж байсан. 1999 оноос хойш 4 аваргалж байсан супер баг ийнхүү аажмаар “унаж” байх шиг байна. Яах аргагүй л настай холбоотой, Данкан аргагүй “хөгширч” байна.

Сансын хувьд Бүх оддын тоглолтын завсарлагын дундуур Амарег зарах солих талаар судалж, оролдож байсан ч одоо бүсийн аваргын төлөө үлдчихлээ. Сайхан л амжилт. Лейкерс – Жаззын хожсонтой тоглоно. Одоогоор Лейкерс 3:0-ээр тэргүүлж байгаа. НБА-ын түүхэнд нэг ч баг 0:3-аас барьж, дараалан 4 хожиж байгаагүй. Спэрс ч үүний жишээг нэмсэн нь энэ.