Атланта – Орландо – 84:98 (23:34, 22:19, 21:22, 18:23)
А: Кроуфорд (18), Смит (16), Жонсон (14)
О: Картер (22), Льюис (17), Нельсон (16)
Цувралын харьцаа: 0-4

Орландо Мэжик эхний 2 шатыг ямар ч зовлонгүй давлаа. Бүсийн хагас шигшээд Атланта Хоукстай таарсан тэд өнөөдөр болсон 4 дэх тоглолтонд 98:84 харьцаагаар хожсоноор бүсийн аваргын төлөө тоглохоор шалгарч үлдэв. Тэд 2 дахь жилдээ дараалан үлдэж байгаа нь энэ.

Плей-оффт сайн тоглож байгаа Винс Картер өнөөдөр ч муугүй байж 22 оноогоор багаа тэргүүлжээ. Ер нь Дуайт, Рашард, Жамеер гээд Мэжикийнхэн бүгдээрээ л өөрсдийн үүргээ сайн гүйцэтгэж, сайн тоглож байна.  Өнөөдөр Хоукс яахав Дуайтийг сайн аргалсан ч Мэжикт олон зэвсэг, сонголтууд байдаг аж.

Тэд 2 онооны довтолгоог 28 хийсэн бол 3 онооны довтолгоог 37 хийсэн байна. Эдгээр 37 шидэлтийнхээ 16-г нь оновчтой болгож.

Хоуксийн хувьд Жо Жонсон энэ цувралд үнэхээр хангалтгүй тоглов. Түүнийг Хоуксийн хөгжөөн дэмжигчид тоглолтын эхнээс л “бүү”-лж байсан бөгөөд хамгийн сүүлд 25 футээс шидсэн нь эйрбол болоход ч энэ явдал үргэлжилж байлаа. Ер нь Жо Жонсон Хоуксийн өмсгөлтэй сүүлийн тоглолтондоо оролцсон байх. Дасгалжуулагч Майк Вудсон ч ялгаагүй Хоуксийг сүүлийн удаа удирдав уу?

Жо Жонсон уг нь энэ зун аль нэг багтаа боломжит хамгийн өндөр цалин бүхий гэрээг хийх эрмэлзлэлтэй байсан ч Мэжикийн эсрэг хийсэн цуврал нь түүний энэ боломжийг үлэмж багасгаж байх шиг. 13 оноо дунджаар авч, 29.8 хувьтай довтолсон тун хангалтгүй статистик үзүүлсэн байна.

Орландо 4 тоглолтондоо дунджаар 25.3 оноо илүү авсан нь плей-оффийн дээд амжилт болжээ. Ялангуяа 2-оор гарсан баг нь 3-аар гарсан багаа ийм илт давуу хожсон нь гайхалтай.

Орландо хамгийн чухал үед хамгийн сайн тоглож байгаа баг бөгөөд өнөөдрийн хожлыг оролцуулаад 14 дараалж, сүүлийн 31 тоглолтынхоо 28-т нь тус тус хожоод байна.

“Бид өөрсдийн гарцаагүй хамгийн сайн тоглолтоо хийж байсан. Орландо агуу баг. Тэдэнд аварга болох боломж хамгийн их байна” гэж Хоуксийн Жамал Кроуфорд хэлж.

4:0-ээр хожсон тохиолдлуудын дунджаар хамгийн олон онооны зөрүүг танилцуулвал:

Орландо сүүлийн 6 жилд эхний 2 шатаа хожигдолгүй давсан 3 дахь баг болж байна. 2005 онд Майами, 2009 онд Кливленд ийм амжилт үзүүлж байлаа. Харамсалтай эдгээр тохиолдолдоо багууд аваргалж чадаагүй болно.

Мэжик бүсийн аваргын төлөө Бостон – Кливлендийн хожсонтой тоглох бөгөөд аль алиныг нь өнгөрсөн улирлын плей-оффт хожиж байлаа.