Аваргуудын лиг, Сери А, Италийн цомд түрүүлж, мартагдашгүй улирлын ард гараад байгаа ч Интер Милан дасгалжуулагчгүй болоод байна. Жозе Моуриньог Реал руу үдээд буй тэд ямар дасгалжуулагчтай болох бол?

Одоогоор ДАШТ дөхөөд хөлбөмбөг сонирхогчид Интерийн дасгалжуулагчийн асуудлыг нэг их анхаарахгүй байх шиг.

Ирэх улиралд Интерийг удирдах боломжтой дасгалжуулагчдыг нэрлэвэл:

Фабио Капелло

Англи энэ удаагийн дэлхийн аваргад хэрхэн оролцохоос Капеллогийн ирээдүй шалтгаалах биз ээ. Шигшээ баг нь тааруу тогловол түүнийг халах шиг амархан зүйл Английн хөлбөмбөгийн холбоонд үгүй. Капелло Английн шигшээгийн боссын ажлаа өгвөл Европын том клубууд сонирхох нь эргэлзээгүй. Түүний дотор дасгалжуулагчгүй байгаа Интер. Гэхдээ Интер ДАШТ дуустал дасгалжуулагчгүй байхгүй л болов уу.

Гуус Хиддинк

Туркийн дасгалжуулагч болсон Гуус Европын аварга клубын дасгалжуулагчид тохирсон нэр дэвшигч гэж яригдаж байна. Нутаг нэгт Уэсли Шнайдер нь Гуусийг багтаа ирэхийг ихэд хүсч байгаа гэсэн.

Синиша Михайлович

Тэрээр Р.Манчинигийн туслахаар Интерт ажиллаж байсан. Энэ долоо хоногийн эхээр Катаниад үргэлжлүүлэн ажиллахаар болсон гэсэн ч Сан Сирод эргэн ирэх тухай яриа улам эрчимжиж байгаа. Моратти лав түүнийг алгаа дэлгэн угтах болно.

Рой Хожсон

Сайн, цэгцтэй хамгаалалтын ачаар даруухан Фулхэмийг Европын лигийн финалд хүргэсэн учраас Хожсоныг зарим топ багууд, түүний дотор Интер судалж байгаа бололтой.

Марчелло Липпи

Липпи өмнө нь Интерийг ганц улирал амжилтгүй удирдаад явж байсан нэгэн. Өөрөөр хэлбэл Интертэй хамт гүйцээгээгүй зүйлс бий. Ямар ч байсан ДАШТ дууссаны дараа шигшээгийн дасгалжуулагчийн ажлаа өгөхөө зарлаад байгаа.