Их Британий Гоол.ком сайт өнгөрч байгаа улиралын шилдэг багийг тодруулжээ. Олон мянган уншигчдын саналаар тодруулсан болохоор та бүхний санаа бодлоос нэг их зөрөхгүй байх.

Мэдээж хэрэг тухайн улиралд аваргуудын лигт түрүүлсэн багийн тоглогчид энэ багт түлхүү багтсан байгаа. Мөн дотооын лигтээ өндөр амжилт үзүүлсэн багуудын түлхүүр тоглогчид багтжээ. Ингээд та бүхэнд энэ улиралын шилдэг багийг танилцуулья.

1-р хэсэг

хагас хамгаалагч :  Чави (Барселона)

Өнгөрсөн улиралд Барса түүнтэй гэрээгээ сунгаж 2014  он хүртэл тоглуулахаар болсон нь ёстой л нүдээ олсон шийдвэр болсон. Ла лигийн ашигтай дамжуулалтын хүснэгтийг Чави энэ улиралд дахин  тэргүүлсэн бөгөөд (14) түүнгүйгээр Каталоны баг ийм өндөр түвшний тоглолт үзүүлж чадах эсэх нь эргэлзээтэй.

Сэтгүүлчид ч Чавигийн талаар ам уралдан магтаж өнөө цагийн хамгийн шилдэг төвийн хагас хамгаалагч хэмээн өргөмжилж байна. Европын нэгэн сэтгүүл түүний дамжуулалт өгөх чадварыг Мишель Платинитэй зүйрлэсэн бол Испаний Марка сонин Чавиг Барсагийн Лотар Маттеус гэжээ. Өдгөө 30 настай түүнд дахиад цөөнгүй жил Барса болон Испаний шигшээн төвийн шугамыг эзэгнэх ур чадвар, нөөц бололцоо байгаа.

Франк Лампард (Челси)

Хэрвээ Лампсаас асуух юм бол энэ улиралыг карьерийнхаа хамгийн шилдгээр эргэлзээгүй нэрлэх байх. Өмнө нь тэр  ерөнхийдөө дунджаар 20 орчим гоолтой улиралыг дуусгадаг байсан бол энэ улиралд 27 гоол, 20 ашигтай дамжуулалт өгсөн амжилтыг үзүүлжээ.

Өөрөөр хэлбэл карьерийн оргил амжилтаа үзүүлсэн гэсэн үг. Сет-пис буюу чөлөөт цохилт, булангийн цохилт, торгуулийн цохилтуудоос Лампс ихэнхи гоолуудаа оруулсан. Мөн өөрийнхөө бренд болсон алсын цохилтоороо ч эсрэг багийнхаа торыг мялаагаад амжжээ. Энэ гайхалтай улиралын дараа Лампс  ДАШТ-д түрүүлэх ирмүүн хүсэл зорилготойгоор Африкийг зорьж байгаа нь дамжиггүй.

Арьен Роббен (Байерн)

Гарцаа байхгүй өнгөрч байгаа улиралын гол сенсаац. Реалын Галактико 2 төлөвлөгөөний золиос болж Мадридаас ”хөөгдсөн” ч энэ шилжилт нь түүнд харин ч сайн зүйл боллоо. Байерн Мюнхений удирдлага Роббений төлөө төлсөн 25 сая еврогоо хэд дахин нугалж олсон гэхэд хилсдэхгүй.

Багаа хүнд байдалд орох бүрт Роббен гайхалтай гоол оруулсаар аваргуудын лигийн финалд шалгаруулсан. Тухайлбал Фиорентина, МанЮ-тай хийсэн тоглолтуудад Роббен зүүн хөл л чухамдаа Байерний аминд орсон гэхэд хилсдэхгүй. Өмнө нь Рибери энэ багийн амин сүнс байсан бол одоо Роббен болсон гэхэд нэг их буруудахгүй байх.

Дээр нь Рибери элдэв асуудалд их орооцолдож фенүүдийнхээ дунд нэр хүндээ унагаад байгаа нь лидерийн үүрэг Роббенд шилжихэд нөлөөлсөн байх. Улиралын төгсгөлд Германы оны шилдэг тоглогчийд тодруулахад Роббен 72.1 хувийн саналаар тэргүүн байранд бичигдсэн бөгөөд энэ шагналыг хүртсэн анхны Голланд тоглогч болсон юм. Ийм шилдэг тоглогчийг явахыг хүсэхгүй байхад нь зарсандаа Флорентино Перез одоо амаа барьж байгаа нь дамжиггүй, гэхдээ нэгэнт өнгөрсөн хойно яая гэхэвдээ ноён Перез.

Леонел Месси (Барселона)

Диего Марадонагийн тодорхойлсноор бурхнаас ч илүү хүчтэй Леонел Месси. Энэ улиралд түүний багийн амжилт өмнөхөөс бага зэрэг буурч аваргуудын лиг, цомын тэмцээнд түрүүлж чадаагүй ч Ла лигийн аваргаа хамгаалж чадлаа. Дээрээс нь К.Роналдугийн 42 гоолын амжилтыг эвдэж Барсагийн төлөө 100 дахь гоолоо оруулан, аваргуудын лигт анхны покероо хийсэн.

Мөн 1996/97 онд тогтоож байсан Роналдогийн 34 гоолын амжилттэй эн зэрэгцэн Ла лигийн мэргэн бууч болсон. Аваргуудын лигийн мэргэн буучаар 2 дахь жилдээ дараалан тодроод байна. Дөнгөж 22 настай хэрнээ альхэдийнэ Барсагийн бүх цаг үеийн мэргэн буучдын толгойн хэсэгт ”давхиж” явна.

Нэг үгээр хэлэхэд Месси бол өнөө цагийн хамгийн шилдэг тоглогч гарцаа байхгүй мөн гэдгээ үйлдэл болгоноороо батлан харуулж байна. Ямар сайндаа Арсене Венгер Аваргуудын лигт Mессид ”дөнгүүлснийхээ” дараа ”

Тэр зүгээр л плэй- стэйшн тоглож байгаа юм шиг байна. Бидний гаргасан алдаа болгоныг тэр ашиглан гоол оруулж байсан. Нэг л хүчээ авчихсан байхад түүнийг зогсоох хүн үнэхээр олдохгүй. Тоглолтыг ганцаараа өөрчилж чадах тийм хүч зөвхөн Мессид л байна” гэж ярьж байхавдээ. Өмнөд Африкт Мессигээс их зүйлийг бид бүгдээрээ хүсэн хүлээж байна. Мэдээж тэр бидний найдварыг алдахгүй байх.

Довтлогч

Уэйн Руни (МанЮ)

Рунигийн гайхалтай улирал харамсалтай нь тун тааруухан дурсамжтай өндөрлөж байна. 2010 оны эхний саруудад Руни улирал ингэж дуусна гэж төсөөлөө ч үгүй байх.

Түүний супер улиралыг сүйтгэсэн үйл явдал 3 сарын 30-нд Байерний талбайд хийсэн аваргуудын лигийн тоглолтын сүүлийн мөчид тохиосон. МанЮ-г аваргуудын лигээс хасагдахад хамгийн их нөлөөлсөн Оличийн сүүлийн гоолын үеэр Руни эвгүй гишгэж шагайндаа хүнд байж болохоор бэртэл авсан.

Аз болж бэртэл нь хурдан эдгэрсэн ч зөрүүд Фергусон түүнийг хариу тоглолтонд гараанд гаргаж дөнгөж эдгэрээд байсан бэртлийг нь дахиад сэдрээж орхисон. Өмнөх ням гаригт нь Челситэй хийсэн лигийн чухал тоглолтонд  оролцож чадаагүй мөн баг нь ялагдал хүлээсэн гээд азгүй явдлууд ар араасаа хөвөрсөөр…

Улирлын сүүлийн тойрогт Челсид премьер лигийн цомоо, Дрогбад лигийн мэргэн буучын цомоо алдаж өөрөө бэртэл аван сэлгээнд сууснаар энэ улирал дууссан нь харамсалтай. Магадгүй хэрвээ бэртээгүй байсан бол Челситэй хийсэн тоглолтонд оролцож багтаа ялалт авчрах байсан ч юм билүү.

Энэ улирлыг Руни 26 гоол оруулсан амжилтаар дуусгаж байна. Улиралын төгсгөл бага зэрэг гунигтай байсан ч өөрийгөө МанЮ-гийн лидер болсон гэдгээ жинхэнэ утгаар нь харуулсан. Роналдугүйгээр юу ч хийж чадахгүй гэж тавлаж байсан хүмүүсийн амыг тэр таглаж МанЮ-гийн домог болох замаа засаж байна. Цаашлаад Английн домог ч болох зам Рунигин өмнө нээлттэй байгаа билээ.

Диего Милито (Интер)

Интерийн ”Ханхүү” Милито сая саяаар үнэлэгдэх үнэ цэнэтэй гоолуудыг энэ улиралд оруулсан билээ. Чухамдаа түүний гоолууд хар-хөхүүдийг гурван цомд хөтлөн аваачсан гэхэд болно.

Итлайин цомын финалд тэр Ромагийн хаалганд цорын ганц хожлын гоолыг оруулса. Мөн Сери А лигийн сүүлийн тойрогт Сиенаг 1 : 0-ээр ялахад бас л Милито гоолдсон. Ингээд болоогүй аваргуудын лигийн финалд дубль хийж багийнхаа гурав дахь цомыг өөрөө бэлэглэсэн.

Өмнө нь тийм ч өндрөөр үнэлэгддэггүй байсан энэ залууг эртхэн багтаа авч байхгүй яавдаа гэж олон багууд аваргуудын лигийн финалын дара халагласан нь дамжиггүй. Женоа, Сарагоса, Расинг гээд дундаж багууд карьерийн ихэнхи жилүүдээ өнгөрөөсөн тэрээр европын топ түвшний багт ирсэн анхны улиралдаа л мэргэн бууч болж гурван цомын эзэн болж чадлаа.

Ид формондоо байгаа түүнийг Месситэй хамт Аргентиний довтолгоонд хэрхэн хослох нь тун их сонирхол татаж байна. Магадгүй Марадонагийн номер нэг сонголт Милито болж мэдэх юм. Ямар ч байсан энэ улирал бол Милитогийнх байлаа.

2009/10 улирлын шилдэг баг (үргэлжлэл) , 8.5 out of 10 based on 6 ratings