Португалын Бенфика багийн довтлогч Оскар Кардозагийн төлөө Английн премьер лигийн топ багууд өрсөлдөж байна. Тухайлбал  Манчестер сити, Эвертон, Сандерланд гэсэн багууд түүнийг багтаа авахаар өрсөлдөж байгаа аж. 26 настай Парагвай эр энэ улиралд 42  тоглолтонд 36 гоол оруулсан гайхалтай амжилтыг үзүүлсэн юм. Энэ жилийн Европын лигт Бенфикатай таарч ялагдал хүлээсэн Эвертоны дасгалжуулагч Дэвид Мойс ялангуяа Кардозагийн араас их хөөцөлдөж байна. Мөн ирэх улиралаас Аваргуудын лигт тоглох болсон Тоттенхэмчүүд ч довтолгоондоо Кардозаг авахаар сонирхож байна. Энэ жилийн ДАШТ-д Парагвайн гол найдвараар тодроод байгаа Кардозаг зарахдаа тулвал 34  сая еврогоор л өгнө хэмээн Бенфика гэдийж байгаа аж.

Голландын домогт тоглогч өдгөө дасгалжуулагчийн албанд зүтгэж байгаа Рүүд Гуллит энэ жилийн ДАШТ-ий дараа Австралийн шигшээ багийн менежер болж магадгүй байна. Одоо Ногоон тивийн багийг дасгалжуулж байгаа Пим Вердеек ДАШТ-ий дараа ажлаа хүлээлгэж өгөхөө мэдэгдсэн учраас тэд Гуллитэд санал тавихаар бэлтгэж байгаа юм байна. Хэрвээ Гуллит Австралид ирвэл тэдний 3 дахь Голланд дасгалжуулагч болно. Өмнө нь Гуус Хиддинк   Вердеекээс өмнө тэднийг дасгалжуулж байсан юм.”Мэдээж хэрэг тэд надад санал тавьбал би бодож үзнэ. Австрали орон надад үнэхээр таалагддаг. Цаг агаар, хүмүүс гээд бүх зүйл нь их сайхан болохоор Голланд дасгалжуулагчид тэд очдог байх” хэмээн Гуллит ярьжээ.

Энэ зун Барсаг орхиж магадгүй байгаа тоглогчдын жагсаалтыг Яя Туре тэргүүлж байгаа. Кот’д Ивиор хагас хамгаалагчын хувьд энэ улиралд Серхио Бускутс хэмээх залуу тоглогчид байраа алдаж гараанд ховорхон гарсан тул сэтгэл дундуур байгаа юм. түүний өөрийнхөө дүү Коло Туре Манчестер ситид тоглож байгаа. Гэхдээ Яя Туре Манчестерт бус Лондонд тоглохыг илүүд үзэж байгаа аж. Сүүлд авсан мэдээллээр Челси клуб түүнийг авахаар 17 сая фунтын санал тавихаар бэлдэж байгаа гэнэ. Мөн Манчестер сити ч энэ долоо хоногийн сүүлээр Яя Туред яг ийм хэмжээний үнийн саналыг тавих аж.

Дэлхийн аваргад оролцох Италийн шигшээд багтаад байгаа Баригийн хамгаалагч Леонардо Бонуччих Ювентус сонирхож байна. Бонуччи энэ жил шилдэг тоглолтыг үзүүлсэн учраас Марчело Липпигийн хараанд өртөн шигшээ багтаа дуудагдсан билээ. Түүнээс Ювед тоглохыг хүсэж байгаа эсэх талаар асуухад ”Би энэ талаар одоохондоо бодож үзээгүй. Мэдээж тэдэн шиг нэр хүндтэй, том баг санал тавихад хэн зөвшөөрөхгүй байх билээ. Сүүлийн үед би Фабио Каннаваротой хамт төвийн хамгаалалтанд их сайн бэлдэж байгаа. Тэр намайг энэ эрчээрээ тоглоод бай гэсэн. Кьеллини зүүн ард тоглох болохоор би өөрийгөө төвийн хамгаалалтад тоглох болов уу гэж найдаж байна” хэмээн ярьжээ. Энэ жил 23 настай Бонуччигийн хувьд 2007 онд багтайгаа хамт Италийн цомд аман хүзүүдэж байсан юм.

Энэ жилийн Ла лигт 7-р байранд орж Европын лигийн урьдчилсан шатнаас өрсөлдөх эрх авсан Вильяреал клуб дээрхи эрхээ алдлаа. Учир нь Атлетико Мадрид энэ жилийн Европын лигт түрүүлсэн учраас ирэх жил Европын лигт тоглохоор болж байгаа. Европын хөлбөмбөгийн дүрэм ёсоор нэг лигээс зөвхөн 3 баг тэмцээнд оролцох боломжтой учир Мальорко, Хетафе, Атлетико гэсэн багууд оролцох болж байгаа юм. Гэхдээ шар шумбагчдад өөр нэгэн найдвар байна. Сүүлийн үед санхүүгийн хүнд байдалд орж, дампуурахад ойрхон байгаа Мальорко клубыг УЕФА европын тэмцээнээс хасвал тэдэнд боломж олдох юм.