Испаничуудын гол найдваруудын нэг Давид Виллагийн ярилцлагыг сонирхуулья. Саяхан багаа сольж Каталоны Барсад харьяалагдах болсон тэрээр энэ дэлхийн аваргын гол сенсаац таригчдын нэг байж магадгүй. Учир нь өмнөх 2006 оны тэмцээнд Испаничууд шөвгийн 16-д ялагдсан ч тэрээр 3 гоол оруулж байсан.
Харин энэ удаа баг нь хэр хол явахаас шалтгаалж Виллагийн оруулах гоолын тоо улам бүр  өсөх биз ээ. Түүний намтрыг SN өмнө нь хүргэж байсан билээ.

Испаний багийн сүүлийн үеийн энэ гайхалтай амжилтын нууц юунд байна ?

Манай багийнхан 2 юм уу 3 сар хамтдаа бэлтгэл хийгээгүй. Бид бүтэн гурван жил шахам хамт байж нэг нэгнээ маш сайн мэдэх болсон учраас энэ хугацаанд бид тоглолтынхоо хэв маягаа олж авсан. Хамтдаа нэг зорилгын төлөө санаа сэтгэл нэгдэж, нийтэч байж чаддаг нь бидний нууц. Талбай дээр ч энэ нь бүрэн харагддаг.

Танай хэсгийн талаар ямархуу бодолтой байна даа ?

Онолын хувьд ч бид хүнд багуудтай хамт багтахаар байсан тэр ч ёсоор болсон. Гондурасын тухай бид сайн мэдэхгүй гэхдээ маш нэгдмэл тоглолттой ДАШТ-д шалгарах бүрэн эрхтэй баг. Швэйцарь бол залуу бүрэлдэхүүнтэй, эрч хүчтэй ер нь яг л Европ стилийн тоглолттой. Бидний айж байгаа хамгийн хүнд өрсөлдөгч бол Чилийн баг л байна. Сонгон шалгаруулалтад яаж тоглосныг нь санаж байгаа байх, Тиймээс тэд хэсэгтээ хамгийн аюултай нь.

2006 оны ДАШТ-аас ямар дурсамж илүү тод үлдсэн бэ ?

Бид тэмцээнийг маш гайхалтай эхлүүлж (Украйныг 4-0 -ээр ялсан) бас би тэр тоглолтонд бүх гоолд оролцсон. Хэсгийн шатыг манайхан маш сайхан амжилттай дуугасан ч дараагийн шатанд гарч ирээд Францын эсрэг энэ бүхнээ харуулж чадаагүй. Би тэмцээнийг 3 гоолтой дуусгасан ч гэсэн тэмцээний уур амьсгалыг сайн мэдэрч чадаагүй л буцсандаа.

Гэхдээ дараа нь Европын аваргад түрүүлсэн шүү дээ. Тэр ялалт Испаний хөлбөмбөгт шинэ эрнийг авчирсан байх ?

Мэдээж хэрэг. Бидэнд (шигшээ багт) хөлбөмбөгийн хүчин зүйлүүдээс илүү эрч хүч хэрэгтэй байсан юм. ”Испаничууд сайн тоглодог ч гэртээ эрт харьдаг”, ”тэмцээн эхлэхийн өмнө тэд өөрсдийгөө аваргууд гэж боддог”, ”Испани торгуулийн цохилтод хэзээ ч өөдлөхгүй” гэсэн ярианууд энэ ялалтын дараа алга болсон. Цаашдаа ч байхгүй байна гэдэгт итгэлтэй байна.

Тэр тэмцээнд оролцсон багаас одоо ДАШТ-д оролцож байгаа бүрэлдэхүүн хэр ялгаатай байна ?

Ер нь ялгаа байхгүй гэж хэлж болно. Ганц хоёр залуу тоглогчид нэмэгдсэнийг эс тооцвол шүү дээ. Багийн ерөнхий суурь огт өөрчлөгдөөгүй. Хамтдаа олон улирал тоглож цом шагнал хүртэж байсан тоглогчид бидэнд байна. Өмнөх бүрэлдэхүүнтэй яг л адил гэсэн үг  л дээ.

Гэхдээ өнгөрсөн жилийн Тив хоорондын цомд танайх тийм ч сайн оролцоогүй. Тэр тэмцээнээс юу ойлгож авсан бэ ?

Өмнө нь бидний өчнөөн мэдэрч байсан тэр зүйлийг л. Нэг л азгүй өдөр бид хасагдах болно. Хагас финалд Америктэй хийсэн тоглолтонд би хүссэн зүйлээ хийж чадаагүй. Бид маш олон боломж гаргасан ч гоол болгож чадаагүй учраас муу тоглосон гэж ас хэлж болохгүй байх.

Торрестэй хамт довтолгоонд тоглох ямархуу санагддаг вэ?

Бид хамтдаа олон жил тоглож байна. Талбай дээр түүнтэй тоглоход үнэхээр түшигтэй, бас амар байдаг юм. Бид хоёр талбайн гадна ч сайн найзууд учраас хамт хоршиход сайхан байдаг. Бидний хослол шилдгүүдийн нэг гэж хэлэх байна. Үүнийгээ ч цөөнгүй удаа нотолж байсан.

Чави-Иниестагийн төвийн хагас хамгаалалтын талаар юу гэж боддог вэ. Одоо та тэдэнтэй Барсад хамт тоглох болоод байгаа шүү дээ ?

Шигшээ багийн тоглолтын арга барилд яг тохирсон тоглогчид. Бас хамтдаа удаан тоглож байгаа болохоор бие биенээ их сайн ойлгодог, тун  маш ухаалаг тоглогчид. Тэд зөв совингоороо тоглож бөмбөгийг үргэлж өөртөө барьж байдаг болохоор манай хамгаалагчдад их амар байдаг юм. Бөмбөг бидэнд байгаа цагт довтлогч нар бөмбөг авахад үргэлж бэлэн байх ёстой.

Тэмцээний өмнө клубээ сольсон нь ямар нэгэн өөрчлөлт авчирна гэж бодоогүй юу ?

Бид өмнө нь хэзээ ч амар тайван зуныг өнгөрөөж байгаагүй. Багууд үргэлжл л миний араас хөөцөлддөг байсан болохоор их дарамттай байдаг байсан л даа. Тийм болохоор нэг их ялгаа мэдрэгдэхгүй биздээ.

Түүхийн хуудас сөхөхөд Баруун Герман 1972  1974 онд Европ, Дэлхийн аваргад дараалан түрүүлж байсан. Испаничууд энэ амжилтыг давтаж чадах болов уу ?

Амжилтууд үргэлж л эвдэгдэж байдаг шүү дээ. Ямар ч байсан хичээгээд л үзнэ дээ.