Гонзало Игуйан ДАШТ эхлэхийн өмнө клубтэйгээ шинэ гэрээ байгууллаа. Эзэн хааны баг түүнийг 2016 он хүртэл үлдээхээр болсон бөгөөд цалингаа ч чамгүй хэмжээгээр өсгөөд амжсан байна. Өмнө нь тэр эзэн хааны багийн хамгийн бага цалинтай тоглогчдын нэг байсан бол одоо улирал бүр 3.5 сая еврогийн цалин авахаар болжээ.

Реалын албан ёсны сайтад ”2006 оны өвөл Мадридад ирсэн цагаасаа л Игуайн хөдөлмөрч зан чанараараа багт маш их тус хүргэсэн. Тийм болохоор тэр ийм хүндлэлийг хүлээх эрхтэй.  Жозе Моуриньо ч шинэ багийнхаа гол тулгуурыг Игуйанаар хийнэ гэдэгт итгэлтэй байна. Мадридийн тоглогч болсноосоо хойш тэр 141  тоглолтонд 64 гоол оруулаад байгаа’‘ хэмээн бичжээ.

Игуайны аав мөн агент Хорхе Игуайн Мадридад ирж клубын спорт эрхэлсэн захирал Хорхе Валданотой уулзаж шинэ гэрээний нөхцлүүдийг ярилцаж тохиролцсон юм байна. Анх Игуйанийг авахдаа Реал Ривер Плэйтэд 13 сая евро төлж байсан юм. 19 настай хүүд ийм их хэмжээний үнэ хаясан нь утгагүй хэрэг гэж тэр үед бичиж байсан ч жил ирэх тусам залуу хүүгийн авьяас чадвар сайжирсаар гарааны эрхийг өөрийнхөө хүчээр олж авч чадсан билээ.

Энэ улиралд л гэхд тэрээр Ла лигийн мэргэн буучдын жагсаалтанд зөвхөн Мессигийн ард л бичигдсэн юм. Хэдийгээр түүний форм сайн байгаа ч Диего Марадона ДАШТ-д гараанд гаргах эсэх нь эргэлзээтэй байна. Шилдэг довтлогчдоор дүүрэн Аргентиний багийн гараанд Месси, Агуеро нар гарах магадлал өндөр байгаа.