Японтой хийсэн нөхөрсөг тоглолтын үеэр гарандаа бэртэл авсан Дрогба өнөөдөр багийнхантайгаа хамт бэлтгэлд гарах гэнэ. Түүний хагалгаа амжилттай болсон бөгөөд маш хурдан эдгэж байгаа учраас 15-нд Португальтай хийх нээлтийн тоглолтын өмнө бүрэн эдгэрэх найдвар байгаа юм байна. Кот’д Ивиорын ХХ-ны албан ёсны сайтад ”Бүх зүйл ном журмын дагуу явах юм бол манай ахлагч эргэн ирэх бүрэн найдвар байна. Бид  ч үүнд итгэлтэй байгаа” гэжээ. Кот’д Ивиорчууд 15-нд эхний тоглолтоо хийж улмаар 5 хоногийн дараа Бразилтай 2 дахь тулаанаа хийх юм.

Арьен Роббений бэртэл ч эдгэрэх тийшээ хандаж байгаа юм байна. Өчигдрөөс эхлэн Роббен Амстердамд мэргэжлийн эмчийн хяналтан дор энгийн бэлтгэл хийж эхэлсэн гэнэ. ”Юу ч гэсэн эхний бэлтгэлийн дараа найдвар төрж эхэлж байна. Одоохондоо энгийн уйтгартай бэлтгэл хийж байгаа ч энэ бүхэн бага багаар сайжирна гэж найдаж байна. Хурдан Өмнөд Африкт очиж багийнхантайгаа нэгдэхийг хүсэж байна. Дөрөв хоног юм уу эсвэл долоо хоногийн дотор онгоцондоо суугаад ниснэ гэж бодож байна” хэмээн Роббен ярьжээ. Түүний авсан шөрмөсний бэртэл 2008  онд авч байсан гэмтэлтэй нь тун төстэй учраас энэ чиглэлээр мэргэжсэн эмч ажиллаж байгаа юм. Недерландчууд 14-нд хэсгийн эхний тоглолтоо Данийн эсрэг хийнэ. Харин 2 дахь тоглолт 19-нд Японы эсрэг байх юм. Роббен хэсгийн сүүлийн тоглолтоос эргэн ирэх боломж байна.