Энэ удаагийн ДАШТ-ыг Ази тивийн багууд сайн эхлүүллээ. БНСУ эхний тоглолтондоо Грекийг 2:0-ээр хожсон бол Японы баг өчигдөр эхний тоглолтондоо Камеруны багийг 1:0-ээр буулгаж авснаар 3 оноотой болж, хэсгээсээ гарах боломж гайгүй болж ирэв.

Японы баг ДАШТ-д анх удаа харь оронд хожил авч байгаа нь энэ гэнэ. Өмнө нь 2 хожил авч байсан бөгөөд 2-ууланг нь 2002 онд буюу өөрийн нутагтаа зохион байгуулсан ДАШТ-д авч байв.

ЦСКА-д тоглодог Кейсуке Хонда тоглолтын 39 дэх минутанд тоглолтын цорын ганц гоолыг хийсэн. Японы баг ДАШТ-ын өмнөх халаалтын тоглолтуудад нэг ч удаа клин-шит хийгээгүй байсан тул тоглолт дуустал давамгайллаа хадгалах найдвар их байгаагүй. Гэвч тэд Хар тивийн хүчтэй багт гоол хийх боломж олгоогүй болно. Мөн Японы багийг аз ч нэлээн түшсэн. Үндсэн цаг дуусч байх үед Камеруны тоглогч С. Мбиагийн холын цохилт хаалганы хөндлөвч оноод буцсан байна. Мөн шүүгчийн мэдлийн цагт Камерун бас нэгэн аюултай довтолгоо хийсэн ч Японы хаалгач Кавасима амжилттай хаажээ.

Одоогоос яг 8 жилийн өмнө буюу 2002 оны 6 сарын 14-нд Япончууд Тунисийг 2:0-ээр хожсон нь тэдний ДАШТ-ын 2 дахь, мөн сүүлийн хожил байв.

Е хэсгийг Голланд, Япончууд 3 оноотой тэргүүлж эхэллээ. Тэд хоорондоо, мөн Камерун – Дани 6 сарын 19-нд тоглоно.

Япон — Камерун 1:0

Гоол: Хонда, 39

Япон: Кавасима – 5,5, Комано – 6,0, Накадзава – 6,5, Тулио Танака – 6,5, Нагатомо – 6,0, Мацуи – 6,0 (Окадзаки, 69 – 5,5), Эндо – 6,5, Абэ – 6,0, Хасэбэ – 6,5 (Инамото, 88), Окубо – 5,5 (Яно, 81), Хонда – 6,5
Камерун: Хамиду – 5,5, Мбиа – 5,5, Нкулу – 5,0, Бассонг – 5,5, Ассу-Экотто – 5,5, Это’О – 5,5, Макун – 5,5 (Жереми, 75 – 5,0), Матип – 5,0 (Эмана, 63 – 5,5), Эно – 5,0, Вебо – 5,0, Шупо-Мотинг – 5,0 (Идриссу, 75 – 5,0)

Шар хуудас: Абэ, 90 – Нкулу, 72
Шүүгч: Бенкеренса (Португал)

Блумфонтейн. “Фри Стэйт”. 30 620 үзэгч