F хэсгийн үлдсэн тоглолт өчигдөр Словак – Шинэ Зеландийн багуудын хооронд боллоо. Словак ДАШТ-ын барааг анх удаа харж байгаа ч хожих магадлалаар харьцангуй илүү гэгдэж байсан ч энэ нь биелсэнгүй. 50 дахь минутанд эхний гоолыг хийж тэргүүлж байсан Европчуудыг Шинэ Зеланд шүүгчийн мэдлийн цагт гомдоон, тэнцээний гоолыг хийж чадсанаар ДАШТ-аас анхны оноогоо авчээ. Шинэ Зеланд өмнө нь ганц удаа буюу 1982 оны ДАШТ-д л тоглож байсан ч хэсгийн 3 тоглолтондоо 3-ууланд нь хожигдож тэмцээнээ дуусгаж байсан түүхтэй аж.

Энэ тэнцээндээ Шинэ Зеландчууд тун сэтгэл хангалуун байгаа бөгөөд дасгалжуулагч Рики Херберт нь: “Би үнэхээр, үнэхээр их бахархаж байна. Бид өмнө нь ДАШТ-ын оноог хэзээ ч авч байсангүй. Өнөөдрийн тоглолтонд бид оноо авах бүрэн эрхтэй тоглосон.

Бидэнд бусад багуудын адил боломж байна. Гэхдээ 2 хүнд учраатай тоглоно, хэцүү байх болно” гэжээ.

93 дахь минутанд тэнцээний гоол хийсэн Рид гоолын баяр хийхдээ цамцаа тайлсан тул шар хуудас авсан. Гэхдээ энэ шар хуудас түүний гоолын хажууд юу ч биш нь ойлгомжтой.

“Гайхалтай байлаа. Эхлээд би хажуугийн шүүгч рүү энэ отон тоглолт байсан эсэхийг нягтлахаар харсан, отон тоглолт биш байсан. Үнэхээр сайхан байлаа”

Харин бэлэн 3 оноогоо алдсан Словакийн дасгалжуулагч Владимир Вейсс тоглолтын тухайд спортод тохиолддог багахан эмгэнэлт явдлын нэг боллоо гэсэн байна.

Шинэ Зеланд дараагийн тоглолтоо 20-нд дэлхийн аварга цолыг эзэмшигч Италийн багтай хийх бөгөөд өнгөрсөн жил эдгээр багууд нөхөрсөг тоглолт хийхэд Итали 4:3-аар хожиж байсан гэнэ.

Одоогоор энэ хэсгийн багууд бүгд адилхан 1, 1 оноотой, 1 гоол хийж, 1 гоол алдсан үзүүлэлттэй болоод байна.

Шинэ Зеланд — Словак 1:1

Гоол: Рид, 90+3 – Виттек, 50

Шинэ Зеланд: Пастон – 5,5, Рид – 6,0, Нельсен – 5,5, Смит – 5,0, Лочхед – 6,0, Бертос – 5,5, Вицелич – 5,0 (Кристи, 78 – 5,5), Эллиотт – 5,5, Фэллон – 5,0, Киллен – 5,0 (Вуд, 72 – 5,0), Шмельтц – 5,5
Словак: Муха – 5,5, Забавник – 5,5, Дюрица – 5,5, Шкртел – 6,0, Чех – 6,0, Вайсс – 6,0 (Кучка, 90), Штрба – 6,0, Гамшик – 6,0, Ендришек – 5,5, Виттек – 6,0 (Стох, 84), Шестак – 6,0 (Голошко, 81)
Шар хуудас: Лочхед, 42; Рид, 90+3 – Штрба, 55
Шүүгч: Дэймон

Рюстенбург. “Роял Бафокенг“. 23 871 үзэгч