28 жилийн дараа дахин ДАШТ-д оролцож байгаа Гондурасийн багийн бүрэлдэхүүнд 3 Паласиос бий. Эд адил нэртэй тамирчид биш, харин адил овогтой залуус. Өөрөөр хэлбэл ах дүүс. ДАШТ-ийн түүхэнд анх удаа 1 багт ах дүү 3 зэрэг багтсан тохиолдол гэнэ. Уг нь бол Уилсон болон Жонни нар л анх шигшээд багтаад байсан ч Жулио Сезар де Леон гэмтсэн тул Гондурасийн ахлах дасгалжуулагч Рейналдо Руеда багтаа Жерриг дуудсан байна. Жерри нь 28-тай, нөгөө 2-оосоо насаар ахмад нь бөгөөд Хятадын лигт тоглодог аж.

“Би Хятадад дэлхийн аваргын зураг үзэж байх үед надад дуудлага ирсэн. Уилсон залгаж байхаар нь гайхаад утсаа автал тэр дасгалжуулагч Руедатай хамт байна, тэр чамтай хэдэн үг солихыг хүсэж байна гэсэн. Мэдээж миний найз де Леон гэмтсэн нь харамсалтай ч яг тэр үед би миний 2 мөрөөдөл биелсэнд бурханд баярлаж байлаа. Эхнийх нь ДАШТ-д оролцох, 2 дахь нь дүү нартайгаа хамт ДАШТ-д оролцох” хэмээн Жерри ярьжээ.

Бага Паласиос нь 23 настай, нутгийнхаа Олимпиад тоглодог бол олонд танигдсан нь дундах Паласиос бөгөөд ПЛ-ийн Тоттенхэм Хотспурт хагас хамгаалагчийн алба хашдаг болно.

Гондурасийн баг хэсгийн эхний тоглолтондоо Чилид 0:1-ээр хожигдсон бөгөөд өнөөдөр 2 дахь тоглолтоо Испаний багтай хийнэ.