Испаний шигшээ өнгөрсөн шөнө Гондурасийг 2:0-ээр хожиж, энэ удаагийн ДАШТ-аас анхны хожлоо авлаа. Эхний тоглолтондоо Швейцарьт хожигдсон тэд Гондурасийг хожихгүй бол ДАШТ бараг дуусах байв. Гондурасийг баг эхний тоглолтондоо Чилид мөн хожигдоод байсан тул хэсгээсээ гарахыг хүсэж л байгаа бол хожих ёстой байлаа.

Испаний дасгалжуулагч Висенте дель Боске өмнөх Швйецарийн эсрэг гаргасан бүрэлдэхүүнээ өөрчилж, Иньестагийн оронд Торресийг, Сильвагийн оронд Навасийг гараанд гаргасан байлаа.

Тоглолт эхлээд удаагүй байхад буюу 17 дахь минутанд Давид Вилья зүүн жигүүрт бөмбөгийг хүлээж аваад 2 хамгаалагчийн дундаас сугаран, улмаар 3 дахийг нь дарж хуураад хаалганд цохьсон нь гоол болж, Испани тэргүүлж эхэлсэн. Вильягийн энэ гоол энэ ДАШТ-ийн шилдэг гоолуудын тоонд зүй ёсоор багтах биз ээ.

Эхний үеийн дунд Фернандо Торрес минутын зайтай 2 ч сайхан боломжоо алдсан. Ер нь Торресийн форм жаахан тааруу байх шиг харагдаж байлаа.

Испани гоол хийсэн ч байнга л довтолж байсан бөгөөд ямар сайндаа Гондурас эхний үе дуусах алдад анхныхаа булангийн цохилтыг авч байхав.

2-р үе эхлээд 6 минут өнгөрч байхад мөнөөх Вилья дахин гоол хийж 2:0 болгосон. Энэ удаа 20 орчим метрээс цохиж, бөмбөг хамгаалагчийн биенээс бага зэрэг чиглэлээ өөрчилж орсон байна.

Ингээд зогссонгүй, 60 дахь минутанд Гондурасийн Емилио Изагирре өөрийн 16 дотор Хесус Навасийг унагаж Испани торгуулийн цохилт хийх эрхтэй болсон. Цохилтыг 2 гоол хийгээд байсан Вилья гүйцэтгэсэн ч алдаж азгүйтжээ. Хет-трик хийх, цаашлаад ДАШТ-ийн мэргэн буучдын жагсаалтыг Игуайний хамтаар тэргүүлэх боломжоо Вилья алдсан. Мөн ДАШТ-ын тоглолтын явцад 11 алсдан анхны Испани тоглогч нь Вилья болсон байна.

Үүнээс хойш Испани нэг их хүчилсэнгүй, хөнгөхөн тоглосоор дуусгажээ. Испани сүүлийн тоглолтоо Чилитэй хийх бөгөөд мөн л хожих шаардлагатай.

Тоглолтын дараа хэн юу хэлэв?

Висенте дель Боске, Испаний дасгалжуулагч
Бид дараагийн тойрогт Чилитэй хийх тоглолтынхоо суурийг тавьсан боловч өнөөдрийн тоглолтыг би сайн гэж бодохгүй байна. Боломжуудыг гаргаж байсан нь үнэн боловч би бүх зүйлд сэтгэл хангалуун байж чадахгүй нь.

Рейналдо Руеда, Гондурасийн дасгалжуулагч
Испаничуудыг бөмбөггүй байлгаж, өөрсдийн довтлогчдоо хангаж өгөх санаатай байлаа. Бидэнд 2-3 боломж гарсан, гэхэдэ яах аргагүй гоол хийх тохиолдол байсангүй. Швейцарийн эсрэг бас нэгэн хэцүү тоглолт байна, гэхдээ тэр тоглолт өнөөдрийнхөөс эрс ялгаатай гэж бодож байна.

Испани — Гондурас 2:0

Гоол: Вилья, 17, 51
Испани: Касильяс – 6,0, Серхио Рамос – 6,5 (Арбелоа, 77 – 6,0), Пике – 6,0, Пуйоль – 6,0, Капдевила – 5,5, Навас – 6,0, Бускетс – 5,5, Хаби Алонсо – 6,0, Хави – 6,0 (Фабрегас, 66 – 6,0), Вилья – 7,0, Торрес – 5,5 (Мата, 70 – 6,0)
Гондурас: Вальядарес – 5,5, Мендоса – 5,5, Чавес – 5,5, Фигероа – 5,0, Исагирре – 5,0, Мартинес – 5,0, В.Паласиос – 5,5, Гевара – 5,0, Турсиос – 5,0 (Нуньес, 63 – 5,5), Эспиноса – 5,0 (Уэлкам, 46 – 5,0), Суасо – 6,0 (Джерри Паласиос, 84)

Шар хуудас: Турсиос, 8; Исагирре, 38
Шүүгч: Нисимура (Япон)
Йоханнесбург. “Эллис Парк”. 54 386

“H” хэсэг.