ДАШТ-ийн 11 дэх өдрийн зарим тоо баримт, статистик мэдээллээс хүргэе.

363

Францын шигшээ баг ДАШТ-д гоол хийж чадалгүй 363 минут тоглосны эцэст Ф. Малуда нэг юм гоолджээ. Үүний өмнөх гоолыг 2006 оны ДАШТ-ийн шигшээ тоглолтын 7 дахь минутанд Зинедин Зидан торгуулийн цохилтоос Италийн хаалганд хийж байв. Гэхдээ энэ 363 минут нь Францын хамгийн удаан гоолгүй цуврал биш. Тэд 1998 оны ДАШТ-ийн шигшээ тоглолтоос 2006 оны ДАШТ-ийн хэсгийн тоглолт хүртэл 369 минут гоол хийж чадалгүй мунгинаж байсан байна.

56

Уругвайчууд хамгийн сүүлд 56 жилийн өмнө буюу 1954 онд ДАШТ-ийн эхний шатны хэсгээ тэргүүлж байжээ. Тухайн үед тэд Чехословакийг 2:0, Шотландийг 7:0-ээр тус тус хожиж цаашаа хагас шигшээд хүрээд Унгарт нэмэлт цагт 2:4-өөр хожигдож байсан гэнэ.

55

Тьерри Анри өчигдрийн ӨАБНУ-ын эсрэг тоглолтын 55 дахь минутанд сэлгээгээр орж ирсэн. Анри шигшээ багийнхаа дебютийг 1997 онд ӨАБНУ-ын эсрэг хийж байсан бол олон улсын тэмцээний анхны гоолоо 1998 оны ДАШТ-д Марсельд ӨАБНУ-ын эсрэг тоглохдоо хийж байжээ.

25

Францын хагас хамгаалагч И.Гуркуфф өчигдрийн ӨАБНУ-ын эсрэг хийсэн тоглолтын 25 дахь минутанд талбайгаас хөөгдсөн. Энэ нь түүнийг Францын шигшээгийн ДАШТ дахь хамгийн хурдан улаан хуудас авсан тоглогч болголоо. Гэхдээ тэр ханьтай. 2002 оны ДАШТ-д Т.Анри Уругвайн эсрэг тоглолтын 25 дахь минутанд улаан хуудас авч талбайг орхиж байжээ.

15

Аргентин ДАШТ-д 15 удаа оролцохдоо ердөө 3 дахь удаагаа л эхний шатны хэсгийн бүх тоглолтондоо хожлоо. 1930 оны эхний шатны хэсэгтээ Франц, Мексик, Чилийг, 1998 онд хэсэгтээ Япон, Ямайк, Хорватийг тус тус хожиж байсан бол энэ жилийн ДАШТ-ын “В” хэсэгт Нигери, БНСУ, Грекийн багуудыг хожлоо.

11

Мексикийн Рафаель Маркес, Куатемок Бланко нар ДАШТ-д 11 дэх тоглолтоо хийж, алдарт хаалгач Антонио Карбахалийн хамтаар ДАШТ-д хамгийн олон тоглосон Мексик тоглогчдын жагсаалтыг тэргүүлэх болов.

7

7 ДАШТ дараалан Аргентиний баг хэсгийн сүүлийн тоглолтоо Европ тивийн багтай хийлээ. Эдгээр 7-ынхоо 3-т нь хожиж, 3-т нь тэнцэж, 1 хожигдсон үзүүлэлттэй.

3

Францын шигшээ ДАШТ зохион байгуулж буй орны багтай 3 дахь удаагаа таарчээ. 1966 онд Англид 0:2-оор, 1978 онд Аргентинд 1:2-оор тус тус хожигдож байсан гэнэ.