Уимблдоны 3 дахь өдөр теннисний түүхэн дэх хамгийн урт тоглолт боллоо. Боллоо ч биш юм, энэ тоглолт дуусаагүй байгаа.

1-р тойрогт учраа таарсан Жон Иснер – Никола Майю нарын тоглолт 10 цаг үргэлжилж, улмаар гэгээ тасарсан тул тоглолтыг ерөнхий шүүгч хойшлуулсан байна. Өмнө нь бас нэг удаа хойшлоод байж. Ингээд нэг тоглолт 3 өдөр үргэлжлэх нь.

Хамгийн удаан үргэлжилсэн тоглолтын дээд амжилтыг 2004 оны Ролан Гаррост Фабрис Санторо Арнуа Клемент нар 6 цаг 35 минутаар тогтоож байж. Харин Уимблдоны түүхэн дэх хамгийн удсан тоглолт нь 1969 онд Панчо Гонзалес – Чарли Пасареллигийн хооронд 5 цаг 12 минут болж, 22-24 1-6 16-14 6-3 11-9 харьцаагаар Панчо хожсон түүхтэй. Тухайн үед тай-брейк хэрэглэдэггүй байж.

Иснер – Майюгийн тоглолт 18-р кортод болсон. Эхний 4 сетийг 4-6, 6-3, 7-6(9-7) 6-7(3-7) гэсэн харьцаагаар буюу 2, 2-оор нь авсан учраас 5 дахь сет гарсан. 5 дахь сетэд тай-брейк гэж гардаггүй. Тиймээс хэн нэг нь 2 гэймийн илүү гарч байж ялагч тодрох ёстой. Гэвч 59-59 болтлоо сунжирчээ. 33-32 байхад Иснерт хожлын оноо авах 2 боломж, 59-58 байхад 1 боломж гарсан ч ашиглаж чадаагүй байна.

21.10 цагийн үед Майю шүүгчид хандан бөмбөгийг харахад хэцүү байгаа тухайгаа хэлж, шүүгч ч тоглолтыг хойшлуулжээ. Майю 7 хоногийн өмнөх урьдчилсан шатны тоглолтонд Британий Алекс Богдановичтой тоглож 3-6 6-3 24-22 харьцаагаар хожсон, ер нь “уяа” нөхөр бололтой.

Энэ хооронд тоглогчид нэг тоглолтонд хийсэн эйсийн дээд амжилтыг ч мөн шинэчлээд амжиж. Одоогоор Иснер 98 эйс хийгээд байгаа бол Май 95-ийг хийжээ. 2009 оны Дэвисийн цомд Иво Карлович 78 сет хийж байсан нь дээд амжилт юм.

Үүнээс гадна “All England club” дэх хамгийн хүчтэй давуулалтыг 2-р тойрогт Тэйлор Дент Новак Жоковичийн эсрэг хйижээ. Дент 148 миль/цагийн хурдтай давуулалт хийсэн байна. Гэхдээ тоглолтонд Жокович хожиж, 3-р тойрогт үлдээд байгаа.

Иснер – Майюгийн хожсон нь 2-р тойрогт Тьемо Де Баккер гэх Голланд теннисчинтэй тоглох оноолттой. Баккер эхний тойрогтоо бас нэгэн марафон тоглолт хийж, Сантьяго Жиралдог сүүлийн буюу 5 дахь сетдээ 16:14-өөр хожсон гэнэ.

Одоогоор Уимблдонд чансаагаар дээгүүр тоглогчдоос Н.Давыденко, Ф.Вердаско, Х.Ферреро  хожигдоод байгаа бол Федерер, Жокович зэрэг тоглогчид 3, Надаль, Роддик, Мюррей, Содерлинг нар 2-р тойрогт үлдээд байна.