Дасгалжуулагчтайгаа маргалдаж тэр уурандаа шигшээ багаасаа зодог тайлсан ”том толгойт” Анелка Лондонд ирсэн даруйдаа Челситэй шинэ гэрээ байгуулжээ. Анелкагийн Челситэй байгуулсан гэрээ ирэх улиралд дуусах ёстой байсан юм. Шинэ гэрээ ёсоор Анелка 2012 онд хүртэл Лондоны багт тоглох аж. 2008 онд Болтоноос Челсид ирснээсээ хойш тэрээр Челсигийн төлөө 138 тоглолтонд 42 гоол оруулаад байна. Клубын албан ёсны сайтад тэрээр ”Челсид анх ирэхдээ би аль болох олон жил энэ багт тоглохыг хүсэж байсан. Том одуудтай хамт мөр зэрэгцэн тоглох нь надад таалагддаг. Тэгээд ч Лондон хот надад үнэхээр таалагддаг. Шинэ гэрээ байгуулсандаа баяртай байна” хэмээжээ. Харин Карло Анчелотти ”Би Италид байхдаа Анелкаг авахыг хүсдэг байсан. Тэр бол өндөр ур чадвартай шилдэг довтлогч. Бидэнтэй хамт дахин нэг жилийг үдэх болсонд нь баяртай байна” гэжээ.