Рожер Федерерийн эрин дуусаж байгаан болов уу? Их дуулгын хамгийн олон түрүүг хүртсэн Рожер өмнөх Их дуулга болох Ролан Гарросийн шөвгийн 8-д хожигдсон. Ингэснээр тэр Их дуулгын хагас шигшээд дараалан шалгарсан цувралаа 23 дээр зогсоосон билээ.

Яахав Рожер хатуу гадаргуутай талбай дээр илүү сайн тоглодог тул олон нийт тэгсгээд түүний хожигдлыг мартсан. Харин Уимблдонд шөвгийн 8-д хожигдоно гэж бодсонгүй. Надальд биш, Жокович, Мюррейд ч биш, Томас Бердыхт шүү.

8 жилд анх удаа Федерер Уимблдоны шигшээд тоглох боломжгүй болж байна. Өнгөрсөн 7 жилд тэрээр энд 6 түрүүлж, 1 үзүүрлээд байв.

Чансааны 12-т бичигдсэн Чех залуу Рожерийг 6-4, 3-6, 6-1, 6-4 харьцаагаар буулгаж авчээ. Энэ хожигдлоо  Ингээд Федерер Уимблдонд 7 түрүүлсэн Пит Сампрасийн дээд амжилтыг давтахын тулд дахин 1 жил хүлээх хэрэгтэй боллоо. Үүнээс гадна 2003 оны 11 сараас хойш анх удаа дэлхийн чансааны 3 хүртэл унах нь.

Бердыхийн хагас шигшээгийн учраа нь Новак Жокович. Новак 8-д Тайваний Ен-Шун Луг 3 сетэд амархан хожжээ. Жокович ирэх долоо хоногт гарах дэлхийн чансаанд 2-т бичигдэх нь тодорхой болоод байна.

Дэлхийн номер 1, энэ тэмцээний чансааны номер 2 Испаний Рафаель Надаль шөвгийн 8-д Шведийн Робин Содерлингийг 3-6, 6-3, 7-6 (7-4), 6-1 харьцаагаар хожиж, хагас шигшээд үлдэв.

Надаль хагас шигшээд талбайн эзэн Энди Мюррэйтэй тоглоно. Мюррей сүүлийн тоглолтондоо Францын Жо-Вильфред Цонгатай тоглож 6-7, 7-6, 6-2, 6-2 харьцаагаар хожсон байна.

Эмэгтэйчүүдийн хагас шигшээд Вера Звонарева Цветана Пиронковатай, Серена Уилльямс – Петра Квитоватай тус тус тоглох болжээ.