Энэ зуны анхны том гэрээг Руди Гэй хийлээ. Лиг тэр аяараа ЛеБрон, Уэйд, Бош руу хошуурч байх хооронд Гэй Мемфис багтайгаа 5 жилийн 82 сая долларын шинэ гэрээ хийсэн байна. Энэ нь Руди Гэйн хувьд авч болох хамгийн өндөр цалин юм. НБА-д тоглосон жилээсээ шалтгаалан тоглогчдын авч болох цалингийн хэмжээ өөр өөр байдаг.

Гэрээ ёсоор Гэй ирэх улиралд 13 орчим саяыг авах бөгөөд дараагийн улиралд 10.5 хувиар цалин нь өсөх юм. Өнгөрсөн улирлын дундуур Гэй 50 саяын саналыг татгалзаж байлаа.

Хязгаарлагдмал эрхтэй чөлөөт агент болоод байсан Гэй Миннесота, Нью-Жерси, Нью-Йорк болон Майами Хит багуудтай уулзаж ярилцахаар зэхэж байсан гэнэ.

23 настай өсөж яваа од өнгөрсөн улиралд 19.6 оноо, 5.9 самбараас авалт дунджилж, хүчирхэг Өрнөд бүсийн плей-оффийн эрхийн төлөө багаа өрсөлдүүлж байв.

Бусад супер чөлөөт агентуудын хувьд, ЛеБрон одоо Кливленд хотод Никс болон Нетсийн удирдлагатай уулзаж байгаа, ойрын хэд хоногтоо багтаж Хит, Буллз, Кавальерсийнхэнтэй уулзах төлөвлөгөөтэй ажээ.