Орландо Мэжик баг хамгаалагч Крис Духонтой гэрээ байгуулжээ. 2 жилийн өмнө Мэжик Духоныг чөлөөт агент байхад нь багтаа элсүүлэх гээд чадаагүй, Духон Никст очиж байв.

Духон Мэжикт 4 жил хүчин зүтгэх бөгөөд 15 сая долларийн цалин авна гэж түүний агент  нь хэлжээ.

Мэжик аваргын төлөө өрсөлдөж чадах баг, мөн Дуайттай хамт тогловол түүний тоглолт илүү сайн гарна гэдэг утгаараа Духонд Мэжик илүү таалагдсан гэнэ. Мэжикийн гарааны холбогчийн байр мэдээж Жамеер Нельсонийх. Духон түүний найдвартай орлогч байх нь мэдээж. Мөн гэмтэл бэртэл зэрэг асуудал үүсдгийг ч мартамгүй. Өнгөрсөн улиралд Мэжикт байсан Жэйсон Уилльямс, Энтони Жонсон нар одоо чөлөөт агент болсон тул Мэжикийн ростерт Жамеераас өөр холбогч байхгүй байв.

Духон өнгөрсөн 2 улиралд Никсийн гарааны холбогчоор тоглосон. Сүүлийн улиралдаа 7.1 оноо авч, 5.6 оновчтой дамжуулалт өгч байв.

Мэжикт тоглохынхоо өмнө Духон Буллзийн эгнээнд 4 жил болжээ.

Дюкийн тоглогч асан тэрээр Ж.Ж.Реддиктэй ахин нэгдэх боломжтой болж байна. Реддик чөлөөт агент болох боломжтой ч Мэжик түүнийг багтаа үлдэнэ хэмээн таамаглаж байгаа гэсэн.