Англичууд Дэлхийн аваргаас хасагдсан ч гэсэн финалын тоглолтонд ямар ч байсан төлөөлөгч илгээх нь ээ. Итали гаралтай Английн шүүгч Ховард Уэбб ДАШТ-ий аваргын төлөөх Голланд – Испаний тоглолтыг шүүхээр болсон байна. Түүнтэй хамт мөн Английн шүүгчид болох Даррен Канн, Майк Маллеркэй нартай хамт ажиллах юм.
Ийнхүү 1974 оны финалаас хойш анх удаа Английн шүүгч ДАШТ-ий финалын тоглолтыг дэнслэх болж байна. Ховард Уэббийн хувьд Английн премьер лигийн тоглолтуудыг ихэнхидээ шүүдэг бөгөөд 2005 оноос ФИФА-гийн зөвшөөрөл авч олон улсын тоглолтуудыг шүүх болсон. Өнгөрсөн улиралд тэрээр Английн ФА цомын финал болон аваргуудын лигийн шигшээ тоглолт зэрэг чухал тоглолтуудыг шүүсэн юм.
Энэ дэлхийн аваргад Ховард H хэсгийн Испани – Швэйцарь, F хэсгийн Итали – Словак, шөвгийн 16-гийн Бразил – Чилийн тоглолтуудыг шүүсэн бөгөөд нэг тоглолтонд дунджаар 5,67 шар хуудас өргөсөн үзүүлэлттэй байгаа юм байна.
Түүний шүүсэн эхний тоглолтонд Испаничууд ялагдсан болохоор Ховардаар тоглолтыг шүүлгэх хүсэлгүй Испаничууд олон байгаа гэнэ.