Барсагийн дасгалжуулагч Пеп Гуардиола шинэ гэрээ байгуулж ирэх улиралыг дуустал Ноу Кампад үлдэхээр боллоо. 39 настай Каталон эрийн Барсатай байгуулсан гэрээ өнгөрсөн сард дуусаад байсан юм. Гуардиола 2008 онд Барсагийн ерөнхий дасгалжуулагчаар томилогдож анхны улиралдаа авч болох бүхий л цомыг хүртэж гайхалтай амжилт үзүүлсэн билээ.

Мөн Тоттенхэмийн дасгалжуулагч Харри Реднап ч шинэ гэрээнд гарын үсэг зурсан байна. Харри 2013  он хүртэл Лондоны багт ажиллах бөгөөд Тоттенхэм түүний дасгалжуулагчийн карьерийн сүүлчийн баг байх болно хэмээсэн байна.

Миланы супер од Роналдиньо нутгийн зүг буцахад ойрхон байна. Бразилийн Фламенго багийн тавьсан саналыг Ронни хувийн зүгээс зөвшөөрөөд байгаа бөгөөд хэрвээ Милантай тохиролцоонд хүрч чадвал энэ шилжилт биелэлээ олох гэнэ. Роналдиньогийн Милантай байгуулсан гэрээ ирэх өвөл дуусах учраас энэ зун л түүнийг зарж чадахгүй бол Ронни чөлөөт агент болох учиртай. Өөрсдөдөө ашиггүй ийм нөхцөл байдалд Миланчууд орохыг мэдээж хүсэхгүй байгаа. Тиймээс Ронни Фламенгод бараг ирсэн гэж хэвлэлүүд бичиж байна.
Фламенгод саяхныг хүртэл Адриано тоглож байсныг та бүхэн мэдэх байх.

Реал Мадридийн арилжаа наймааны төлөөлөгчийн мэдэгдсэнээр тэд Стивен Жеррардыг авах бодлоо орхисон гэжээ. 30 настай Англи эрийг Жозе Моуриньо багтаа харахыг хүсэж байна гэж мэдэгдэж байсан ч Флорентино Перез түүнд зарах илүүдээ гарсан мөнгө байхгүй хэмээн гэдийсэн аж. ”Кака үлдэнэ, харин Жеррардын хувьд нас нь 30 гарсан болохоор Перез эргэлзээд байх шиг байна. Дээр нь Ливерпуль түүний төлөө 70 сая еврог нэхэж байхад аргагүй шүү дээ” хэмээн Реалын төлөөлөгч ярьжээ.
”Моуриньо Рамосыг баруун жигүүрт тоглуулах учраас төвд найдвартай хамгаалагч хэрэгтэй байна. Бид одоохондоо Майконд санал явуулаагүй байгаа” гэж тэрээр үргэлжлүүлжээ.