Дэлхийн аварга хэмээх эрхэм алдрын төлөө 120 минутын турш хүндхэн тоглолт хийсэн Испанийн шигшээ Иньестагийн цорын ганц гоолын ачаар хожил авсан билээ. Харин тэдний ялалтын баяр үргэлжилсэн хэвээр байна. Испанийн ардын баатар болоод байгаа Иньестатай “АР” агентлаг ярилцжээ. Тэрээр ДАШТ-ий турш гоол бага оруулсан ч хамгийн идэвхтэй тоглолт үзүүлж байсан юм. Ингээд түүний “АР”-д өгсөн ярилцлагыг хүргэж байна.

-Дэлхийн аварга болсон сэтгэгдлийг тань хуваалцаж амжаагүй юм байна. Яг одоо ямар байна?

-Үнэнийг хэлэхэд би одоо хүртэл тайвширч чадахгүй байгаа. Гоол оруулж байсан тэр агшин байнга нүдэнд үзэгдээд л. Дээрээс бүгд л Иньеста, Иньеста гэж хашгирч байгаа болохоор мартах ч сонирхол алга. Миний хамгийн жаргалтай мөч гэвэл би үүнийг л нэрлэнэ. Бидний баяр Өмнөд Африкаас эхэлсэн. Тэндээс эхлээд онгоцон дотор, онгоцны буудал, Мадрид хот гээд л. Нэг зүйлийг дуулгахад манай шигшээ багийнхан бүх хотоороо явж баяраа тэмдэглэхээр болсон. Яагаад гэвэл Испани улс тэр чигээрээ бидний ард байсан болохоор бүгдтэй нь энэ агуу баярыг хуваалцах хэрэгтэй гэсэн шийдвэр гаргасан.

-Өмнөд Африкт буцаад очьё. Болно биз дээ?

-Тэгэлгүй яахав. Дуртайяа зөвшөөрч байна. Өмнөд Африк бидэнд үнэхээр ээлтэй байсан. Ард түмэн нь ч зочломтгой юм билээ. Энэ нутагт өнгөрүүлсэн нэг сарын хугацаа надад маш урт санагдсан. Гэхдээ хоол нь үнэхээр дажгүй амттай шүү. Өдөр бүр байсан. Тоглолт бүхэн хариуцлагатай. Харин одоо бол юу ч бодохгүй баяраа тэмдэглээд л явж байна.

-Тоглолтынхоо талаар яриач?

-Үнэхээр гайхалтай тоглолт болсон. Манай баг хэсгээсээ гарснаасаа хойш маш хэцүү багуудтай таарч тоглож байсан. Герман, Голланд, Португали гээд л бүгд хөлбөмбөгийн спорт өндөр хөгжсөн орон. Биднийг маш цөөхөн гоолтой тоглож байна гэсэн шүүмжлэлийг би Өмнөд Африкт байх хугацаандаа олон сонссон. Би цөөхөн гоолтой ч гэсэн хамгийн гоё тоглолтыг манай багийн нөхөд гаргасан гэж боддог. Португалитай тоглоход надад маш хүнд байсан. Яагаад гэвэл би Португали хэв маягийн тоглолтыг маш сайн мэддэг. Бид хамгаалах төлөвлөгөө боловсруулж гарч ирж байсан. Роналдугийн хүчтэй довтолгоог яаж зогсоох талаар бид үргэлж бодсоор ирсэн. Харин үр дүн нь маш сайхан гарсанд бага зэрэг тайвширсан. Герман, Голланд ч гэсэн маш сайн баг. Гэхдээ бид тэдний тоглолтын хэв маягийг тийм ч сайн мэдэхгүй. Ялангуяа Германы тамирчид тоглолт бүртээ л хувьсан өөрчлөгдөж байсан шүү дээ. Германы шигшээ довтолгоондоо илүү анхаарлаа хандуулж байсан. Харин бид боломжийг алдахгүй байхыг хичээж тоглосноороо хожил авлаа. Бид өөрт олдсон боломжийнхоо 80 хувийг ашиглаж чадсан. Энэ үр дүн л манай багийг дэлхийн аварга болгосон шүү дээ.

-Тэгвэл Голланд ямар байсан бэ?

-Тэднийг би маш бохир, бүдүүлэг тоглосон гэж боддог. Бид яг л тэдний адил тоглосон. Харин энэ тоглолтын үр дүн нь 14 шар хуудас байсан шүү дээ. Бүгд үүнийг харсан байх. Цэвэр хөлбөмбөгийг өрсөлдөөнийг тэд үзүүлж чадаагүй. Гэхдээ тэдний хамгаалалт дэндүү сайн байсан гэдэгтэй хэн ч маргахгүй байх. Голландыг тамирчдыг би тоглолтын дараа нөхөрсөгөөр уучлалт гуйна гэж итгэлтэй байсан. Харамсалтай нь тийм зүйл болсонгүй.

-Танай багийнхны хувьд?

-Бид үнэхээр шилдэг байж чадсан болохоор дэлхийн аварга болсон шүү дээ. Тэдний дундаас Касилъясыг онцлох хэрэгтэй. Тэр үнэхээр бидний аврагч, баатар шүү дээ. Багийн хаалгач ямар хүнд үүрэгтэй байдгийг зөвхөн тамирчин, дасгалжуулагч нар л ойлгоно. Бусад зөвхөн хөндлөнгөөс л дүгнэлт хийдэг. Гэхдээ сонирхогчийн үүднээс шүү дээ.

-Нэг үеэ бодвол Испанид хөлбөмбөгийн сэргэлт ирж байна, тийм үү?

-Тэгэлгүй яахав. Испанийн хөлбөмбөг 2007 оноос дээш маш хурдацтай өндөр түвшинд хөгжиж байгаа. Нэг хэсэг уналтад ороод байсан нь үнэн. Харин бид түүхийг шинэчилж байна. Үүнээс хойш Испанийн хөлбөмбөг үргэлж дэлхийд дээгүүр байх болно. Би үүнийг амлаж чадна. Манай улсын эзэн хаан хүртэл “Испани улсад хөлбөмбөгийн шинэ эрин үе эхэллээ” гэж хэлсэн шүү дээ.

-Одоо та юу хийх вэ?

-Шигшээ багийнхан нэг хэсэг амрах зөвшөөрөл авсан. Би гэртээ хариад ээжийнхээ хоолыг идмээр байна.

-Дөрвөн жилийн дараа Бразилид ДАШТ болно. Энэ талаар?

-Тийм ээ. Дэлхийн аварга болно гэдэг үнэхээр сайхан. Харин энэ цолыг хамгаална гэдэг маш хэцүү шүү дээ. Бид дахиад л ДАШТ-дээ бэлтгэнэ. Бас лиг байгаа шүү дээ. Хөлбөмбөг надаас хэзээ ч холдохгүй. Би ч хөлбөмбөгийг орхихгүй. Одоо Испанид хүн бүр хөлбөмбөг тоглохыг хүсч байна. Энэ бол сайхан хэрэг. Харин бид үүнийх нь эхлэл болж. Бразили ДАШТ-д маш эрчимтэй бэлтгэж байгаа гэж сонссон.

-Төгсгөлд нь ДАШТ-ийг шүүсэн шүүгчдийн талаар юу бодож байна?

-Тэдэнд алдсан зүйл олон бий. Шүүлт хангалттай байгаагүй шүү дээ. Голландтай аваргын төлөө тоглоход дүрмийн бус алдааг хүртэл шүүгч зүгээр л өнгөрөөж байсан. Алонсог жийж, спортын бус алдаа гаргаж байхад шар хуудас өгөөд л өнгөрсөн. Энэ мэтчилэн шүүгчид дутагдалтай тал их байлаа. Үүнийг эс тооцвол ДАШТ зохион байгуулалт сайтай болж өнгөрсөн гэж би хувьдаа дүгнэж байгаа.

Орчуулсан : М.Батсүх