Энэ сарын 16-наас 18-ны өдрүүдэд өдрүүдэд Азербайжаны нийслэл Баку  хотноо FILA-гийн Алтан гран-при тэмцээн болж өнгөрлөө. 3 дахь жилдээ зохион байгуулагдаж байгаа энэхүү тэмцээнд манай улсаас чөлөөт бөхийн төрөлд эрэгтэй нэг, эмэгтэй дөрвөн тамирчин зодоглож, нэг мөнгө, нэг хүрэл медаль хүртсэн байна.
Эмэгтэйчүүдийн 63 кг-ын жинд хүч сорьсон ОУХМ О.Насанбурмаа эхний тойрогт  хийлж дараагийн шатанд Испаний Фажардо Претьог, хагас шигшээд АНУ-н Н.Пирижиковыг буулган авч аваргын төлөө үлдсэн боловч Польшийн тамирчин Монико Михаликт ялагдал хүлээжээ. Энэ тамирчны хувьд 2006, 2007 оны FILA-гийн ДАШТ-аас 2 хүрэл медаль зүүж байсан Польшийн олимпийн шигшээ багийн тамирчин юм.
51  кг-д зодоглосон МУГМ Ц.Энхжаргал эхний тойрогтоо хийлж 2-р шатанд Замира Рахмановад ялагдсан боловч дагах барилдаанд зодоглож, Молдавын Наталия Будуг 9:3 харьцаатай илт давуу ялалт байгуулж, хүрэл медалийн эзэн болжээ.

Алтан гран-при тэмцээнд зодоглосон манай бусад тамирчдын тухайд 67 кг-д өрсөлдсөн Б.Одончимэг эхний барилдаандаа ялагдсан бол 72 кг-ын жинд О.Бурмаа шагналт байрт шалгарсан байна.

Харин эрэгтэйчүүдээс ганцаараа Бакуг зорьсон гавьяат тамирчин Б.Наранбаатар харамсалтай нь медалийн тавцанд гарч чадсангүй. Эрэгтэйчүүдийн 55 кг-ын жинд хүч сорьсон манай тамирчин эхний тойрогтоо хийлж, хоёрдугаар тойргийн барилдаандаа тэмцээнийг зохион байгуулагч орны бөх Азар Пашаевыг ядах юмгүй буулган авч , улмаар дараагийн барилдаандаа Бээжингийн олимпийн хүрэл, дэлхийн аваргын алт, мөнгө, Европын аваргын мөнгө, хүрэл медальт Болгарын шилдэг бөх Радослав Великовт 4:1 харьцаатай ялагдсанаар тэмцээнээ дуусгасан ажээ.