Барселонагийн шинэ довтлогч, ДАШТ-ийн гол оддын нэг Давид Вилья дасгалжуулагч Пэп Гуардиолатай уулзах уулзалтыг хүлээж тэсэж чадахгүй догдолж байгаа гэнэ.

“Би Пэпийн бэлтгэлд гарахыг ихээр хүсэж байна. Зөвхөн түүнээс гадна багийн хамтрагчид маань надад юу хэлж, зөвлөх бол гэдгийг мэдэхийг хүсэж байна.

Пуойль надад хэлэхдээ тэр өмнө нь хэзээ ч Пэп шиг дасгалжуулагчтай байж үзээгүй гэсэн. Барсаг сонгохоос өмнө Пэп надад олон мессежүүд ирүүлсэн.

Шигшээ баг болон Барса адилхан систем буюу 4-3-3 ашигладаг. Би довтолгооны 3 байрлалын алинд нь ч тоглож чадна” гэж Вилья ярьж байна.

Мөн Реал Мадридийг Жозе Моуриньо удирдах болсон нь Барсаг илүү мотивацжуулж буй хэрэг гэж Вилья үзэж байгаа гэнэ. Ялангуяа Жозегийн удирдсан Интер Милан өнгөрсөн Аваргуудын лигээс Барсаг мулталсан болохоор Барсагийн тоглогчид түүнд дахин ялагдахгүйн төлөө ихэд хичээж биз.

“Эль Классико бол ер бусын тоглолт, үүнд оролцохыг ихээр хүсэж, хүлээж байна. Би Ла Лигт түрүүлэхийг, Аваргуудын лигт түрүүлэхийг, тэгээд Эль Классикод хожихыг хүсэж байна. Өшөө цомууд, хожлууд, гоолууд хүсэж байна ” гэжээ.

Мөн ДАШТ-ийн тухай эргэн дурсахдаа:

“Швейцарьт хожигдсоны дараа, Гондурастай тоглох хүртэл 3-4 хоног үнэхээр муу байсан, хэсгийн сүүлийн буюу Чилитэй тоглохын өмнөх өдөр түүнээс ч муу байсан байх. Энэ хамгийн хэцүү тоглолт байж, хүнд хэцүү нөхцөлтэй бид нүүр тулсан. Бид сайн баг нь байсан ч ДАШТ-с хасагдаж болохыг мэдэж байлаа. Бидний азгүй өдөр таарвал хасагдах шатанд ч үлдэж чадахгүй тэмцээнийг орхиж болохоор байсан. Тоглолтын өмнө хувцас солих өрөөнд бид анир чимээгүй байж, тоглолтонд өөрсдийгөө төвлөрүүлсэн. Зочид буудлаас эхлээд талбайд гаран гартал…Би өмнө нь хэзээ ч тийм их нервт өртөж байсангүй.

Хамгийн сэтгэлд хоногшсон, шилдэг тоглолт бол Португалийн эсрэг хийсэн тоглолт. Тэр тоглолтонд би бөмбөг авах бүртээ сайн хөдөлгөөнүүд хийж, хамгаалагчаа аргалж байсан. ”
Хэрэв Вилья Алтан бөмбөгийг хэнд өгөхийг шийдэх эрхтэй бол Икер Касильяст өгөх гэнэ. “Тэр манай хамгийн чухал тоглогч. Тэр бидэнд асуудал гарвал байнга дэмжиж чаддаг нэгэн” гэжээ.

Европын аварга болсныг Дэлхийн аваргатай харьцуулах аргагүй, Дэлхийн аварга бол үнэхээр агууг тэр Мадридад болсон баярын парадад илүү тодоор мэдэрсэн гэнэ.

Шигшээ тоглолтын талаар “Энэ миний амьдралын хамгийн урт тоглолт байсан. Шүүгчийн сүүлийн шүглийг сонсоод аз жаргалыг мэдэрсэн. Иньестагийн гоолын дараа Икерийн уйлж байгааг харахад үнэхээр сэтгэл хөдлөм байлаа. Чави, Иньеста, Капдевильяг харахад ч ижил. Би хүүхэд шиг л уйлсан. Миний мөрөөдөл болсон тэр явдлын талаар үргэлжлүүлээд би тодхон санаж байна” гэжээ.