Фабио Аурелио 2 сарын дараа Ливерпульд эргэн ирлээ. Бразил хамгаалагчын Улаануудтай байгуулсан гэрээ 5 сарын төгсгөлд дуусаж чөлөөт агент болоод байсан юм. Харин Рой Хожсон түүнийг дахин Анфиелдэд авчирч тоглуулахаар шийджээ.

Хожсон энэ талаар ”Би клубын удирдлагад Аурелиог шинэ багтай болсон байсан ч хамаагүй түүнтэй уулзмаар байна гэж хэлсэн. Харин түүнийг ямар нэгэн багт очоогүй гэдгийг нь мэдмэгцээ эргүүлж авчрахаар шийдсэн. Зөвхөн би ч биш клубын бусад ажилчид ч түүнийг дахин ирсэнд баяртай байгаа. Фабиогийн форм ч гэсэн дажгүй байна билээ” гэжээ.

Аурелио 2006 онд Испаний Валенси клубээс Анфиелдэд ирж байсан юм. Өнгөрсөн хугацаанц тэрээр 110 тоглолтонд Улаануудын төлөө оролцож 4 гоол оруулсан. Сонирхуулахад 2008 оны аваргуудын лигийн хагас финалд Ливерпуль – Челси багууд оноолт таарахад Жо Жоул Аурелиог хүнд бэртээж байсан юм. Харин одоо эдгээр тоглогчид нэг багт хэрхэн зохицож тоглох нь сонирхол татаж байна.

”Энэ бүхэн яг л би анх удаа Ливерпультай гэрээ байгуулах гэж байгаа юм шиг санагдаж байна. Шинэ босстойгоо би шинэ амжилтын төлөө тэмцэх болно. Миний зорилго бол багаа  өнгөрсөн улиралаас илүү өндөр амжилтанд хүргэх. Бид бүгдээрээ үүнд итгэлтэй байна” хэмээн Аурелио ярьжээ.