Чилийн шигшээ багийн дасгалжуулагч, аргентин мэргэжилтэн Марсело Бьелса 2015 оныг хүртэл албандаа үлдэхээр болжээ. Өмнөд Америкийн баруун эрэгт,- Андын нурууг даган оршдог газар зүйн өвөрмөц тогтоцтой энэ улсын хөлбөмбөгийн шигшээ баг Бьелсагийн ачаар 1998 оноос хойш анх удаа ДАШТ-д тоосоо өргөж, шөвгийн 16-д шалгарсан билээ. Аргентин эрийн Чилийн хөлбөмбөгийн холбоотой байгуулсан гэрээ долдугаар сарын 31-нд дуусгавар болоход Холбооны ерөнхийлөгч Харолд Майн-Николс тэр даруй хамтран ажиллах шинэ нөхцөлийг танилцуулан үлдээсэн байна. Бьелса 1998-2004 онд Аргентиний шигшээ багийг дасгалжуулахдаа “Альбеселесте”-г 2004 онд олимпийн аварга болгож, мөн ондоо “Copa America”-д үзүүрлүүлсэн ч ажлын үр дүнгийн гол шалгуур ДАШТ-д (2002 он) багаа хэсгийн тоглолтоос ч гаргаж чадаагүй юм. 2007 оноос Чилийн шигшээг удирдсан тэрбээр одоогоор багаа 46 тоглолтод оройлон орсноос 25 хожиж, долоон удаа тэнцэн, 14 хожигдоод байгаа юм.