Ливерпуль-Арсеналын тоглолтонд Жо Коул болон Лорен Косиелни нар улаан хуудас аван талбайг орхицгоосон. Эдгээр тоглогчдын хувьд шинэ багтаа анхны тоглолтондоо оролцоод байв. Энд дебют тоглолтондоо улаан хуудас авч талбайг орхиж байсан тоглогчдыг танилцуулъя.

Жо Коул – Ливерпуль vs Арсенал – 2010

Экс Челсигийн тоглогч Коул 44 дэх минутанд бас нэгэн дебютант Лорен Косиелнид эвгүй такл хийж, улмаар улаан хуудас авснаар багаа 10 хүнтэй үлдээж хүнд байдалд орхисон.

Лорен Косиелни – Ливерпуль vs Aрсенал – 2010

Коул түүн дээр алдаа гаргаж хөөгдсөн бол Косиелни тоглолт бараг өндөрлөж байхад 2 дахь шаардлагагүй шар хуудсаа авснаар талбайг орхижээ.

Лионель Месси – Унгар vs Aргентин – 2005

Лио Мессигийн шигшээ баг дахь дебют нь онцлог. 18 настай байсан тэрээр ердөө 2 минутын дараа Унгарын хамгаалагч Вилмос Ванчакийн нүүр лүү тохойдсоноор шууд улаан хуудас авчээ. Гэхдээ Месси тэр цагаас хойш байнга өсөн дэвжсээр одоо дэлхийн шилдэг хөлбөмбөгчин болоод байна.

Жонатан Вудгэйт – Рeaл Maдрид vs А. Бильбао – 2005

Вудгэйт бол Мадридийн Галактико 1-ийн хүрээнд авсан сүүлийн тоглогч нарын нэг. Тэрээр гэмтлийн улмаас дебютээ хийж чадалгүй удаж удаж нэг юм талбайд гарсан ч авто гоол хийж, улаан хуудас авч хөглөж байлаа.

Райн МакГивен – Шотланд vs Умард Ирланд – 2008

Ман.Ситигийн зүүн хамгаалагч байсан тэрээр Шотландийн эсрэг шигшээгийн анхны тоглолтоо хийж, 2 болхи хамгаалалтандаа 2 шар хуудас хүртэж талбайг орхиж байж.

Кагишо Дикгачой – Фулхэм vs Вест Хэм – 2009

Кагишо өнгөрсөн жил ПЛ-ийн дебютээ Вест Хэмийн эсрэг хийхдээ Скотт Паркер дээр гаргасан алдаанаасаа болж шууд улаан хуудас авч байлаа.

Гарри Флиткрофт – Блекбэрн vs Эвертон – 1996

Зүүн хойд зүгийн ривал Ман.ситигээс ирсэн Флиткрофт Эвертоны эсрэг дебютээ хийж цаг дуусахаас 3 минутын өмнө Тони Грантийг тохойдож хөөгдсөн гэнэ.

Гленн Килей – Эвертон vs Ливерпуль – 1982

Шинэ багтаа анхны тоглолтоо хийхэд хэн ч сайн тоглохыг хичээж нервтэх биз. Хамгийн том дербид бол бүр ч тодорхой. Килей 1982 онд дебютээ Мерсисайдын дербид хийжээ. Гэхдээ тэрээр 30 дахь минутанд алдарт Кенни Далглишийн бөмбөгийг булаахаар такл хийхдээ дүрэм зөрчиж тоглолтоос хөөгдсөн байна.

Жейсон Кроу – Aрсенал vs Бирмингем - 1997

Арсеналын залуу одын дебют рекорд тогтоож байлаа. Бирмингемийн эсрэг ФА-ын цомд тоглоход тэрээр сэлгээгээр орж ирээд ердөө 33-хан секундийн дараа талбайгаас хөөгдсөн байна. Мэдээж залуу тоглогч гарааны тоглолтондоо үүнээс шал өөрийг мөрөөдөж хүсэж байсан биз ээ.