Ливерпулийн 20 саяын үнэтэй ”флоп” Алберто Аквилани нутгийн зүг хүлгийн жолоо залахаар боллоо. Гэхдээ тэр өсөж төрсөн Ромадаа бус харин Туриний алдарт Ювентус клубт зээлээр тоглохоор болсон нь сонирхолтой.

Улирлын төгсгөлд Юве түүнийг жинхэлж өөрийн болгох гэрээ байгуулсан гэнэ. Тодруулбал 17 сая евро төлж түүнийг бүрмөсөн авах юм байна.

Рафаель Бенитезийн хийсэн хамгийн бүтэлгүй наймаануудын нэг гэгдэж байгаа Аквилани ууг нь Англид анх ирэхдээ огт өөр бодолтой байсан.

Түүнийг Хави Алонсогийн орон зайг нөхөж Ливерпулийн шинэ нүүр царай болно гэж ноён Рафа их л итгэл найдвар хүлээлгэж Ромоос дуудаж авчирсан. Харамсалтай нь Рафа түүнийг ”шилэн” гэдгийг гадарлаагүй бололтой. ”Шилэн” Акуа Италиас ирэхдээ л ”цуурсан” байсан бөгөөд улирлын эхний хагасын бэртлээ эдгэрүүлэх гэсээр байгаад өнгөрүүлсэн.

Харин сүүлийн хагаст дажгүй тоглож багтаа тус болж чадсан ч энэ нь хэсэгхэн хугацаанд л үргэлжилсэн юм.
Копуудын нэгэн үеийн түүхийг бичилцсэн Рафа халагдаж Рой Хожсон ирснээр Аквиланигийн ирээдүй бүрхэг болсон. Улмаар шинэ улирлын эхэнд Хожсон Итали эрийг өөрийнхөө төлөвлөгөөнд багтаагүй гэдгийг зарласнаар Акуа нутаг буцах нь тодорхой боллоо. Хожсон хэлэхдээ түүнийг зөвхөн зээлээр явуулахаар төлөвлөж  байгаа. Хэрвээ тэндээ сайн тоглоод дасгалжуулагчынхаа итгэлийг хүлээвэл үлдээх эсэх талаар дахин ярилцах болно гэсэн юм.