Ливерпульчууд Трабзонспорын талбайд гол тоглогчидгүйгээр зочлох гэж байна. Пүрэв гаригт тэд Туркийн багийн талбайд Европын лигийн урьдчилсан шатны хариу тоглолтоо хийх юм. Өмнөх тоглолт Анфиелдэд болж Бабелийн нэг гоолоор Улаанууд ялсан.

Гэхдээ нэг гоолын зөрүү гэдэг тун эгзэгтэй учраас Копууд санаа амарч болохгүй. Ливерпулийн ахлагч Стивен Жеррард нурууны бэртлээс болж харин Фернандо Торрес мөн бэртлийн улмаас дээрхи тоглолтонд оролцохгүй.

Харин Барса руу явахад ойрхон байгаа Машерано тодорхой шалтгаанаар Туркыг зорихгүй юм байна.
Иймээс гарааны бүрэлдэхүүнд Нгог багтах магадлал өндөр байгаа юм.
Рой Хожсон Жеррардын бэртэл тийм ч хүнд биш бөгөөд ням гаригийн тоглолтонд оролцоно гэжээ.
Харин Торресыг эрсдэлтэй байдалд оруулахгүйн тулд амраахаар шийдсэн аж.
Эдгээр тоглогчдоос гадна Даниель Аггер, Макси Родригез нар ч бас Трабзонспорын эсрэг тоглохгүй. Тэд бага зэргийн зовиуртай байгаа учраас багийн эмч нар тоглохыг хориглосон гэх.
Рой Хожсон өрсөлдөгчийнхөө талаар ”Тэд бол Туркийн шилдэг 3 багийн нэг. Ер нь Турийн хөлбөмбөг сүүлийн жилүүдэд маш сайн болж байгаа. Дээр нь энэ багийн фенүүд маш аюултай. Уг нь бид Анфиелдэд бүхнийг дуусгах байсан юм. Одоо гүйцээгээгүй ажлаа дуусгах хэрэгтэй байна” гэжээ.

Дашрамд дуулгахад Машерано Манчестер ситигийн эсрэг тоглох боломжтой байсан гэнэ. Харин Рой Хожсон түүнийг багийн дотоод уур амьсгалд нөлөө үзүүлнэ гээд гаргаагүй юм байх.