Сагсан бөмбөгийн ДАШТ 8 сарын 28-наас 9 сарын 12-ны хооронд Туркт зохиогдох гэж байна.

Тэмцээнд түрүүлэх боломжтой гол баг нь мэдээж АНУ боловч тэдний бүрэлдэхүүн хэт залуу, туршлага бага байгаа нь Испани зэрэг бусад багуудад боломж олгож буй юм.

ДАШТ-д амжилттай оролцох боломжтой багуудын тухай товчхон өгүүлье.

ИСПАНИ:

Дараалан 3 жил НБА-ын финал хүртэл тоглож, энэ хооронд бас шигшээ багтаа ч хүчээ өгч байсан По Газоль энэ жил амаръя гэж шийдэж, ДАШТ-д тоглохгүй болсон. Харин Газолийг эс тооцвол бусад тоглогчид нь ДАШТ-д тоглоно. Энэ долоо хоногт Хосе Кальдерон гэмтсэн ч холбогчийн байрлалд Хуан Карлос Наварро болон Рики Рубио бий болохоор санаа зовох зүйлгүй биз.

По эзгүй тул Марк Газоль багийнхаа самбарыг авч гарна, түүнд Фрэн Васкес сайн туслах нь мэдээж.

2006 оны Дэлхийн аварга, 2008 оны Олимпийн дэд аварга, 2009 оны Европын аварга, 2007 оны Европын дэд аварга энэ баг Туркийн ДАШТ-ийн хамгийн туршлагатай, хамгийн биш ч нэлээн авьяаслаг бүрэлдэхүүнтэй баг бөгөөд зөвхөн алтан медалийн төлөө л өрсөлдөх болов уу.

ГРЕК:

Тео Папалукас нь байхгүй.

AРГЕНТИН:

Жинобили байхгүй, нөөц нь тийм сайн биш ч туршлагатай зальтай тоглогчид бий. Тэмцээний яаж ч мэдэхээр баг нь Аргентин.
БРАЗИЛ:

Нене, Варежао болон Тиаго Сплиттер нартай тэд тэмцээний хамгийн мундаг том тоглогчидтой баг нь байсан. Гэвч Нене ДАШТ-ийг өнжих болсон нь тэдний хүчийг ихэд сулрууллаа.

Бразил өмнө нь муу дасгалжуулагчтай тул том амжилтаас хол байсан бол энэ удаа тэднийг Рубен Магнано удирдах болно. Тэрээр Аргентинийг дасгалжуулж 2004 оны Олимпийн аварга болгож, 2002 оны ДАШТ-ийн мөнгөн медальд хүргэж байв.

СЕРБИ:

2008 оны олимпийг өнжсөн тэд 2009 оны Европын аваргаар мөнгөн медаль хүртэж сюрприз барьсан. 2009-2010 оны Евролигийн MVP Милос Теодосич Сербийн багийг тэргүүлэн ДАШТ-д өрсөлдөнө.

Грекийн багтай тоглоход тавьтаргүйтэж, зодоон цохионы гол дүрд тоглосон Ненад Крстичийн олиггүй үйлдэл Сербийн имижид сөргөөр нөлөөлөх магадлалтай.
ФРАНЦ:

Тони Паркер, Микаэль Пиетрус, Рони Туриаф, Родди Беаубу болон Жоаким Ноа нар ДАШТ-д тоглохгүй. Тэгэхээр Борис Диау, Ник Батум нар л багаа тэргүүлэх нь. Уг нь Франц үндсэн бүрэлдэхүүнээрээ оролцсон бол ямар ч багаас айхааргүй байжээ.

АНУ:

Америкийн багт олон залуу одод бий. Гэхдээ тэд бол олон улсын тэмцээний туршлагагүй, бас улсдаа хамгийн сайн, авьяаслаг тоглогчид нь биш.

2008 онд Америк олимпийн аварга болсны гол шалтгаан нь ерөөсөө л НБА-ын хамгийн сайн тоглогчдыг цуглуулж чадсанд байсан. Сайн тоглогчид биш, хамгийн чадвартай, авьяаслаг тоглогчид.  Коби, Уэйд, ЛеБрон, Дуайт гээд дэлхийн сагсан бөмбөгийн супер тоглогчдын авьяас ур чадвар нь сонирхогчдын дүрэм, тоглолт дахь олон онцлог, бэрхшээлүүдэд няцалгүй “босоо” байж багаа аварга болгосон. Шууд хэлбэл Америк 2008 онд авьяас, ур чадварынхаа ачаар түрүүлсэн гэж болно.

Гэхдээ л аваргын төлөө Испани тэдэнтэй бас ойрхон л тоглосныг санах хэрэгтэй.

Харин энэ жилийн бүрэлдэхүүн нэг л жул харагдаж байна. 1992 оноос хойшхи Олимп, ДАШТ-д Америкийн багийн бүрэлдэхүүнд багтан тоглосон тоглогчид тухайн жилийнхээ НБА-ын 1, 2, 3-р багуудад нэрлэгдсэн болон Бүх оддын тоглолтонд оролцсон байдлыг  доорх хүснэгтээр харуулъя.

	1992	1994	1996	2000	2002	2004	2006	2008	2010
NBA 1-р баг	5	0	4	3	0	1	1	4	1
NBA 2-р баг	4	2	4	1	0	0	2	1	0
NBA 3-р баг	0	4	4	1	3	0	1	1	0
Бүх одод *	11	7	12	7	5	2	5	10	3

[* - НБА-ын багт нэрлэгдсэн ч Бүх оддын тоглолтонд шалгараагүй 2002 оны Бен Уоллес, 2008 оны Дерон Уилльямс нарыг оруулсан.]
Эндээс харахад 2010 оны баг маань 2002 болон 2004 оны багуудтай ойролцоо, авьяастнаар маруухан харагдав. Өнгөрсөн улирлын Бүх оддын тоглолтонд л гэхэд 3-хан тоглогч нь оролцсон.

Ер нь холбогчийн байрлалаас бусад байрлалд Америкийн баг Туркт хамгийн сайн нь биш байх нь ээ. Ялангуяа том, самбарын тоглогчийн байрлал Америкийн багийн гол сул тал нь. Анх бэлтгэлд дуудагдсан Амаре Стаудмайр, ихэр Лопес, Дэвид Ли гээд тоглогчид нь гэмтэл бэртэл, бусад шалтгаанаар багаа орхисон. Одоо зөвхөн Тайсон Чандлер гэсэн ганц цэвэр төвийн тоглогч бий. Майк Кржижевский бүр Ламар Одомийг төвийн тоглогчоор тоглуулах туршилтуудыг хийж байгаа.

1994 оны ДАШТ-ийн баг нь оддоор дулимаг байсан ч тэр үеийн НБА болон бусад улсуудын тоглогчдын ур чадварын түвшин хэт зөрүүтэй байсан нь тодорхой. Одоо бол энэ зөрүү улам л багассаар байгаа.

По Газоль, Ману Жинобили, Дирк Новицки, Яо Мин, Тони Паркер болон Эндрью Богут гээд улс бүрийнхээ лидерүүд нь тоглохгүй нь л Америкийн боломжийг нэмж байгаа болов уу.
Гэхдээ л Испаний багт Марк Газоль, Руди Фернандес Рики Рубио, Хуан Карлос Наварро, Жорхе Гарбахоса, Серхио Ллул гээд сонирхогчдын буюу ФИБА-ын дүрмэнд илүү тохирсон тоглолттой тоглогчид бий.
Бас энэ удаагийн Америкийн багт НБА-ын плей-оффийн том тоглолтонд оролцсон туршлагатай хэр олон тоглогчид байгааг ч сонирхоод үзэхэд гэмгүй.

• 2004 оны багт аваргын бөгжтэй тоглогч ганц (Данкан), финалд тоглосон тоглогч 2 (Iverson, Jefferson) л байсан бөгөөд бусад нь бүсийн аваргын төлөө ч тоглоогүй, тэр баг олимпт дөнгөж хүрэл медаль авсан.
• 2006 оны багт ганц аварга (Wade) тоглогч, бусад нь бүсийн аваргын төлөө ч тоглоогүй, тэр баг ДАШТ-д мөн хүрэл медаль авсан.
• Харин 2008 оны баг бол өөр байсан. Энд аварга цолтой 3(Коби, Уэйд, Принц), финалд тоглосон 2 (Кидд, ЛеБрон), бүсийн аваргын төлөө тоглосон 2 (Дерон, Бузер) тоглогч байж, Олимпийн аварга болсон.
2010 оны баг Биллапс, Одом гэсэн 2 аваргатай ч бусад нь плей-оффийн том тоглолтын туршлага бүү хэл Тайсон Чандлерийг эс тооцвол плей-оффийн 1-р шатыг ч давж үзээгүй тоглогчидтой.

Испани, Аргентин, Бразил, Грек, Серби гээд багууд 2008 онд хамгийн супер тоглогчдын  бүрэлдэхүүнтэй Америкийг хожиж чадаагүй бол энэ удаа тэдгээр супер тоглогчидгүй, харин залуухан, авьяаслаг хэдий ч туршлага, хэргэм зэрэг хомс, бас самбарын сайн тоглогчгүй Америкийн багийг хожиж чадах эсэхийг 8 сарын 28-наас 9 сарын 12-ны хооронд харцгаая.

Америк фаворит нь мөн үү?, 9.9 out of 10 based on 7 ratings