Спортын цонх төрийн бус байгууллагаас зохион байгуулдаг “Спортын цонх цом-2010” хоёр дахь удаагийн тэмцээн өнгөрөгч амралтын өдрүүдээр Нийслэлийн Баянзүрх дүүргийн 97-р сургуулийн хөлбөмбөгийн ногоон талбайд явагдаж өнгөрлөө.

Хөлбөмбөг сонирхогч залуусыг өргөнөөр хамруулдаг тэмцээнд дэмждэг клубээрээ баг бүрдэн оролцдогоороо онцлогтой бөгөөд энэ жилийн тэмцээнд Манчестер Юнайтед багийн “Улаан чөтгөрүүд”, Челси багийн “True Blues”, Арсенал багийн “Буучид”, Реал, Барселона, Италийн лигийн холимог “Калчио”, Ливерпуль багийн “Копууд”, бусад лигийн холимог “Фэйр Плей” багууд өрсөлджээ. Энэхүү тэмцээнд Спортын цонх ТББ-ын гишүүд буюу www.sportnews.mn/forum онлайн хэлэлцүүлгийн гишүүд хамрагддаг.

Өнгөрсөн жилийн тэмцээний шигшээ тоглолт “Монгол Эль Классико” болж Реал Мадрид түрүүлж байсан бол энэ жил Лондонгийн дерби буюу Челси-Арсеналын тулаан боллоо.

Тэмцээний аварга торгуулийн цохилтоор шийдэгдэж Челси баг энэ жилийн “Спортын цонх цом”-ын эзэн болжээ. Харин хүрэл медалийг Италийн лигийн дэмжигчдийн Кальчио баг гардлаа. Тэмцээний шилдэг тоглогчоор Кальчио багийн хамгаалагч Интерийн фэн Бадрангуй, шилдэг хаалгачаар Челсигийн Э.Билгүүн, шилдэг довтлогчоор Э.Баярбат нар шалгарч дэлхийн шилдэг Сони брэндийн гарын бэлгийг хүртжээ.

Тэмцээний ерөнхий ивээн тэтгэгчээр “Наран электроникс” компаний Сони брэнд ажилласан байна.