Монголын чөлөөт бөхийн түүхэнд нэгэн шинэ хуудсыг нээж Дэлхийн аварга гэсэн эрхэм хүндтэй цолыг хүртсэн С.Батцэцэгээр эх орон нь бахархаж байна. Одоогоос 35 жилийн тэртээ Минскт зохиогдсон дэлхийн аваргаас Хөдөлмөрийн баатар, гавьяат тамирчин Х.Баянмөнх, З.Ойдов нар хос алтан медалийг эх орондоо авчирч байсан билээ. Өмнө жил нь Туркийн Стамбулд зохион байгуулагдсан ДАШТ-аас  хөдөлмөрийн баатар З.Ойдов дэлхийн тавцанд Монгол гэсэн нэрийг цуурайтуулж чөлөөтийн анхны алтан медалийг хүртэж байсан юм.
Харин энэ жил Монголчууд бид  олимпийн 3 дахь аваргаа өлгийдөн аваад баярын нулимс хатаж амжаагүй байхад олон жил хүлээсэн чөлөөт бөхийн дэлхийн аваргын медаль эргэн ирлээ. Гэхдээ бүр эмэгтэйчүүдийн төрөлд анх удаа хүртсэн нь эр бяр, авхаа самбаа шаардсан бөхийн төрлүүд манай улсад ямар элэгтэй болохыг  харуулж байна. С.Батцэцэг 1990 онд Архангай аймгийн Хашаат суманд мэндэлсэн.
2007 онд сумынхаа дунд сургуулийг төгссөн тэрээр  МУБИС-ийн япон хэлний ангид элсэн орж тэр жилдээ чөлөөт бөхөөр хичээллэх болжээ.  “Замчин” клубт Улсын заан, Гавьяат тамирчин З.Дүвчингийн удирдлага дор бэлтгэл сургуулилтаа хийж эхлэсэн  С.Батцэцэгийн амжилт нүд ирмэх зуур ахиж гуравхан жилийн дотор дэлхийн шилдгүүдийг айлгах хүчтэй бөх болон бэлтгэгдсэн нь түүний төрөлхийн хөдөлмөрч зан чанартай холбоотой.
2008 оноос тэрэр эмэгтэй чөлөөт бөхийн үндэсний шигшээ багт Улсын заан, Гавьяат тамирчин З.Дүвчин, Гавьяат дасгалжуулагч Т.Сүхбаатарын удирдлага дор бэлтгэл сургуулилтаа хийж эхэлсэн. Дотоодын тэмцээнүүдээс улсын аврага шалгаруулах өсвөр үе, залуучууд, насанд хүрэгчдийн аварга болж байсан.
2009 онд Филиппин улсын Манила хотод болсон Ази тивийн залуучуудын аварга шалгаруулах тэмцээнээс алтан медаль, 2010 онд Энэтхэг улсын Нью-Дели хотод болсон Ази тивийн аварга шалгаруулах тэмцээнд мөнгөн медаль хүртэж байсан.

Москва хотод болж байгаа ДАШТ-нд тэрээр  нэгдүгээр тойрогт хийлж хоёрдугаар тойрог канадын бөх, олимпийн наадмын мөнгө, хүрэл медальт, ДАШТ-ний хошой хүрэл медальт Тоня Лунн Вервеекийг 1:2, 8:4 онооны харьцаагаар ялж гуравдугаар тойрогт бразилийн бөх Суиза да Сильваг 4:0, 1:0 онооны харьцаагаар буулган авсан. Улмаар хэсгийн аваргын төлөө барилдаанд японы бөх, дэлхийн дөрвөн удаагийн аврага Аяко Шодаг 0:2, 3:3, 3:5 онооны харьцаагаар ялж алтан медалийн төлөө барилдаанд хятадын бөх, дэлхийн аврага Чжан Ланыг 4:0, 4:0 онооны харьцаагаар ялснаар дэлхийн аварга цолыг хүртсэн юм. Түүний хүч үзсэн  59 килограммын жинд нийт 22 бөх зодоглосон байна.