52 кг жинд медалийн төлөө барилдсан М.Бундмаа Японы алдарт бөхийг барсангүй, вазари үнэлгээ алдаад даралтанд орсноор хожигджээ.

Ингэснээр одоо хүрэл медалийн төлөө Германы Роми Тарангултай өрсөлдөхөөр болж байна.

Цагаанбаатар мөн медалийн төлөө өрсөлдөх эрх авахын тулд Унгарын Миклош Унгвариг юко үнэлгээгээр ялжээ.

Одоо тэрбээр хүрэл медалийн төлөөх барилдаанаа Испанийн жудоч Сугой Уриатетай хийх юм байна.

***

update
Эмэгтэйчүүдийн 52-д хүч сорьсон ОУХМ М.Бундмаа хүрэл медалийн төлөөх барилдаанд Германы жүдоч Роми Тарангулыг цэвэр яллаа. Ийнхүү тэрээр Жудогийн ДАШТ-аас медаль хүртсэн монголын 2 дахь эмэгтэй жудоч болж байна. 2005 оны дэлхийн аваргаас манай шилдэг жудоч Х.Эрдэнэт-Од мөн хүрэл медаль зүүж байсан юм.

***

Монгол Улсын Хөдөлмөрийн баатар Х.Цагаанбаатар жүдогийн дэлхийн аваргаас хүрэл медаль хүртэж ДАШТ-ий хос медальтай монголын анхны жудоч боллоо. Өнгөрсөн жил Роттердамд болсон дэлхийн аваргаас манай тамирчин алтан медаль хүртэж эх орон элэг нэгтнүүдээ баярлуулж байсан билээ. Манай тамирчин хүрэл медалийн төлөөх барилдаанд Испаний жүдоч Сугои Уриартег цэвэр ялж медалийн болзол хангасан байна.

Эрэгтэйчүүдийн 66 кг-ын жинд нийт 74 жүдоч зодоглосон бөгөөд манай тамирчин А хэсэгт сугалаа татсан.   Эхний тойргийн барилдаанд Х.Цагаанбаатар хийлж, хоёрдугаар тойрогт Пакистаны бөхийг , гуравдугаар тойрогт Гүржийн бөхийг мөн цэвэр ялж зооны аваргын төлөө Азербайжаны Тарлан Каримовтой барилдахаар болсон. Энэ барилдааны 02 : 17 дахь минутад манай бөх Иппон үнэлгээ авч өрсөлдөгчөө буулган авсан юм. Харамсалтай нь  хэсгийн аваргын төлөө Японы бөх Жунпей Моришитад ялагдсанаар дагах барилдаанд зодоглох болсон билээ.

Харин дагах барилдаанд манай тамирчин Унгарын бөх Миклас Унгвариг юүко үнэлгээгээр ялж, дэлхийн аваргын хүрэл медалийн төлөө барилдах эрхтэй болсон юм. Жудогийн дэлхийн аваргаас өмнө нь манай бөхчүүд 4 медаль хүртээд байсан. Харин энэ тоо Токиогийн дэлхийн аваргад хоёроор нэмэгдлээ.

***

Харин энэ жинд зодоглосон дэлхийн цомын эзэн С.Миярагчаа эхний тойрогт хийлж дараагийн шатанд Унгарын Золт Горжанацыг цэвэр  ялсан ч дараагийн даваанд бүдүрчээ. Манай бөхийг Унгарын Андрес Миттерфиллнер 41 секундэд Иппон үнэлгээгээр ялсан байна.