“Байерн Мюнхен” – “Майнц” – 1:2 (1:1)

Хүснэгтийг тэргүүлэгч, лигийн зуун хувийн амжилттай яваа Майнц энэ удаа Байерн Мюнхений талбайд зочлон тоглож 2-1-ээр хожиж 18 дахь оноогоо авлаа. Ингэснээр Майнц, Байерн Мюнхен багуудыг 10 оноо зааглаж эхлэв.

Өмнөх тоглолтонд Риберигээ алдаж талбайн голд ихээхэн хохирол амссан Байерн заавал хожих хэрэгтэй байсан.

Майнцийн Сами Аллагуй 15 дахь минутад эхний гоолыг хийсэн ч үеийн төгсгөлд Данийн хамгаалагч Бо Свенссон өөрийн хаалганд гоол хийн тоог тэнцүүлсэн юм.

Тоглолт эхэлмэгц олны хүлээж байсан шиг сонирхолтой тоглолт өрнөж эхний таван минутад Ивица Олич, Сами Аллагуй, Бастиан Швайнштайгер дахиад Аллагуй нарын ширүүн довтолгоонууд өрнөж нэг бол байгаа онохгүй нэг бол хаалгач дээр очоод дуусч байлаа.

Ер нь Майнц хамгаалалтандаа түлхүү анхаарч, Байерн довтолгоог удирдаж тоглож байлаа. 14 дэх минутад Мирослав Клозе тун сайхан боломж алдсан ба үүний төлөөсөнд Аллагуй Люис Холтбигийн хөндлөн дамжуулалтыг чулуу болгосноор Майнц тоог нээсэн.

Үүнээс хойш Майнц бага зэрэг сууж Байерн довтлох боломжийг эрж хайсаар Томас Мюллер тун сайхан боломжийг Тони Кроосд гаргаж өгсөн. Гэсэн хэдий ч Кроос гоол болгож чадсангүй. Удалгүй Клозегийн мөргөсөн бөмбөг хачир аван шонгийн дотор талд ойсон хэдий ч аз нь Байернаас хол байжээ. Харин түүний дараа Майнц өөрсдийнхөө хаалганд гоол хийх нь тэр. Бо Свенссон толгойгоороо арагш хаалгач Кристиан Ветклод бөмбөг дамжуулах гэсэн боловч хаалгачийг даван бөмбөг хаалганд орж тоо тэнцсэнээр нэгдүгээр үе өндөрлөсөн.

Тоглолтын хоёрдугаар үе дөнгөж эхэлмэгч Майнцийн гол найруулагч Холтби гэмтэл авч довтолгоонд гарз учирсан. Байерн ч дорвитой довтлохгүй байлаа. Байерн довтолгоог төдийлэн сайн зохион байгуулахгүй голчлон холын зайнаас үе үе цохиж байсан юм. Марк ван Боммелд нэг боломж гарч ирсэн ч мөн л чадаагүй. Ер нь талбайн эздийн өдөр өнөөдөр биш байлаа.

Тоглолтын төгсгөлд Майнц олдсон боломжоо гайхалтай ашигласан юм. Сэлгээнээс орж ирсэн Андре Шуэрлэ хөндлөн дамжуулалтыг Адам Сзалайд өгч, тэр ч бөмбөгийг тун сайн тогтоон эхний бөмбөг хүлээн авалтаараа гоёмсог эргэлтийг хийж хүчирхэг цохилтыг гүйцэтгэснээр Буттын хаалгыг мялааж Майнц тэргүүллийг авсан.

Үүний дараа довтлох шаардлагатай болсон Байерний дасгалжуулагч Луи ван Гааль төвийн хамгаалагч Даниел ван Буйтэнг довтолгоонд тавьж аюултай довтолгоо хийгдсэн ч Ветклогийн гайхалтай хаалтаар өндөрлөж зочид ээлжит гурван оноогоо авсан.

Байерн ийнхүү өөрийн багийн домог Карл Хайнц Руминеггигийнхээ төрсөн өдрөөр талбай дээрээ ялагдаж 6 тоглолтоос дөнгөж 8 оноотой явж байна.

“Санкт-Паули” – “Боруссия Д” – 1:3 (1:1)

Гоол: Гросскройц, 17 (0:1). Хеннингс, 26 (1:1). Кагава, 50 (1:2). Гросскройц, 60 (1:3).

Майнцийн араас нэхэж буй Дортмунд хэдийгээр хожсон ч гурван онооны зааг нь хэвээр үлдлээ. Сүүлийн хэдэн тоглолтонд тун сайн буй Шинжи Кагава эхний гоолын дамжуулалтыг Кевин Гросскройцд өгснөөр тоог нээсэн хэдий ч 25 дахь минутад Санкт Паули тоон тэнцүүлсэн. Гэсэн хэдий ч Дортмунд үргэлжлүүлэн довтолсоор Шинжи Кагава 50 дахь минутад тоглолтын гурав дахь гоолыг хийн тэргүүлж эхэлж Гросскройц Нури Шахиний цохилт хөндлөвчинд ойсныг нэмснээр 3-1-ээр Борусси Дортмунд ээлжит ялалтаа авлаа.

“Штутгарт” – “Байер” – 1:4 (0:2)

Гоол: Хююпя, 19 (0:1). Видаль, 21 (0:2). Кузманович, 53 (1:2). Балич, 70 (1:3). Сэм, 89 (1:4).

Штуттгартын бүтэлгүйтэл үргэлжилсээр. Мерседес Бенц Аренад болсон тоглолтонд Штуттгартын Мауро Каморанези Барнетта дээр алдаа хийн улаан хуудас авснаар Байер Леверкузенд тун сайхан давуу тал үүссэн.

“Шальке-04″ – “Боруссия М” – 2:2 (0:2)

Гоол: Даемс, 16, пенальти (0:1). Брэдли, 43 (0:2). Хюнтелар, 52 (1:2). Рауль, 87 (2:2).

Гладбах, Шальке багууд аль аль нь хожигдлын цувралаа дуусгаж эвийн гэрээ байгууллаа. Талбайн эзэд тоглолтын ихэнхи үед давуутай тоглож байсан. Тоглолтын эхэнд хоёр гоол алдсан ч сүүлийн хэсэгт хамгаалалт нь суларсан Гладбахын хаалганд хоёр гоол хийснээр их үнээр нэг оноо авлаа. Филип Даемс Рауль Бобадилагийн олж авсан пенальтийг чулуу болгож, Майкл Брэдли бас нэгэн гоол хийснээр эхний хагаст Гладбах хоёр гоолын илүүгээр тэргүүлж дуусгасан. Хоёрдугаар үе эхлээд удаагүй байхад Клаас-Ян Хунтелаар гоол хийж тоог ойртуулсан. Тэр гурав дахь тоглолтондоо дараалан гоол орууллаа. 87 дахь минутад Рауль тэнцээний гоол хийснээр тоглолт өндөрлөлөө.

“Айнтрахт Ф” – “Нюрнберг” – 2:0 (1:0)

Гоол: Гекас, 16 (1:0). “Крис”, 88 (2:0).

Франкфуртийн баг улирлын хоёр дахь ялалтаа авлаа.

Майнцийн ээлжит золиос Байерн Мюнхен, 10.0 out of 10 based on 5 ratings