Дэлхийн шатрын 39-р олимпиад 2010 оны 9-р сарын 20ноос 10-р сарын 4-ний өдрүүдэд ОХУ-ын Ханты-Мансийскт манай гаригийн 160 орны шатарчдын дунд амжилттай явагдаж өндөрлөлөө.

Монгол улсын шатарчдын багийн бүрэлдэхүүнд 2 их мастер,2 олон улсын мастер, 3 ФИДЕ-гийн  мастер бусад нь үндэсний цолтой залуу шатарчид болон МШХ-ноос С.Энхцаг, Т.Сумъяа нар багтаж явсан юм.

Эрэгтэйчүүдийн тэмцээнд 148 баг оролцож швейцарь системийн 11 тавилын дараа Украин 19, ОХУ-I 18, Израиль 17 оноогоор алт, мөнгө, хүрэл медалийн эздээр тодорч манай тамирчдын баг 11 оноотой 71-р байрын амжилт үзүүллээ. (2008 онд явагдсан Дрездений олимпиадад 11 оноогоор 73-р байранд орсон юм).

Хувийн дүнгээр Б.Гүндаваа 1-р ширээнд 3,5 (10 өргөөс), Н.Баттулга 2-р ширээнд 5 (9), Г.Эрдэнэ 3-р ширээнд 4 (9), Ц.Батчулуун 4-р ширээнд 5 (9), Б.Хатанбаатар 5-р ширээнд 4,5 (7) хожил тус тус авчээ.

Эмэгтэйчүүдийн тэмцээнд 114 орны шатарчид оролцсоноос ОХУ-I 22, БНХАУ 18, Гүрж 16 оноогоор алт мөнгө хүрэл медаль хүртэж манай баг 11 оноотой 51-р байр эзлэв. (2008 оны олимпиадад 14 оноогоор 17-р байрын амжилт гаргаж байв).

Хувийн дүнгээр: ИМ Б.Мөнгөнтуул 1-р ширээнд 6,5 (9), 2-р ширээнд У.Лхамсүрэн 2,5 (8), 3-р ширээнд А.Энхтуул 5 (9), 4-р ширээнд Б.Анхчимэг 6 (10), 5-р ширээнд С.Отгонжаргал 5,5 (8) онооны амжилт  тус тус үзүүлэв. С.Отгонжаргал ширээндээ шилдэг 20 шатарчны 9-рт шалгарав.

Мэдээндээ хачир болгон дурьдахад: Солонгосын багийн 4-р ширээнд тоглосон Ч.Мөнхбат (2236) 8,5 (11) оноо авч энэ үзүүлэлтээр 9-р байр эзэлсэн бөгөөд багийнхаа амжилтыг ахиулахад дорвитой нэмэр оруулжээ. Түүний эцэг Чогдов шатарчдын тухай дуу зохиосон, ахмад шатарчин байсан билээ.

Сүүлчийн тавилд манай шатарчны уран нүүдлээр довтолж хожсон өргийг сонирхуулъя.