Бямба гаригт Бирмингэмтэй хийх тоглолтонд Арсеналын хэд хэдэн бэртэлтэй байсан тоглогчид эргэн ирэх гэнэ. Улирлын эхэнд шигшээ багтаа тоглож байгаад бэртэл авсан Тео Валкотт болон Дани довтлогч Николас Бендтнерийн бэртэл эдгэрчээ.

Арсене Венгер ”Бидэнд сайн мэдээ байна бас муу мэдээ ч байна. Юуны түрүүнд Бендтнер болон Киеран Гиббс нар багийнхантайгаа эргэн нэгдсэн. Бас Тео энгийн бэлтгэл хийж эхэлсэн. Гэхдээ Бирмингэмийн эсрэг тоглох эсэхийг шийдээгүй байгаа. Эцсийн мөч хүртэл харзнаж байж шийдвэрээ гаргана. Энэ сайн мэдээ. Харин муу мэдээ гэвэл Ческ Фабрегас эргэж ирэх болоогүй байна. Ирэх мягмар гаригийн Аваргуудын лигийн тоглолтыг ч бараг өнжиж таарах байх” гэжээ.
Арсеналын бэртэлтэй тоглогчдын жагсаалт Ческээр дөнгөж эхэлж байна.

Венгер энэ талаар цааш үргэлжлүүлэн ”Бакари Санья шигшээ багтаа тоглож байхдаа бэртэл авсан. 10 хоногийн дараа эргэж ирнэ гэсэн урьдчилсан дүгнэлт гарсан. Томаш Вермаелен бас 10 хоног хүлээгдэхээр болоод байгаа. Харин Алмуниа болон Ван Персигийн тухайд одоогоор тодорхойгүй байна” гэсэн.
Ван Перси 9 сарын эхээр бэртэл авсан. Харин Алмуниа Вест Бромвич багт 3-2-оор ялагдахад тохойндоо бэртэл авсан юм.