Нутагтаа болсон оюутны ДАШТ-д түрүүлсэн боксчид дараагийн тэмцээний бэлтгэлдээ гарчээ. Насанд хүрэгчдийн ДАШТ тэгш тоотой жил болдоггүй тул манай ширэн бээлийтнүүдийн 2010 оны хамгийн гол тэмцээн нь “Гуанжу-2010” Азийн наадам юм. “Шар тив”-ийн “олимп”-д оролцох багт тамирчдын нэр эцсийн байдлаар тодроогүй бөгөөд зарим жинд сорилт тоглолт хийхээр болжээ. 56 кг-ын жинд ОУХМ Э.Идэрхүү, бэртэл нь эдгэж буй хөдөлмөрийн баатар, гавьяат тамирчин Э.Бадар-Ууган хоёрын нэг нь өрсөлдөнө. Түүнчлэн Олон улсын боксын холбооны мэргэжлийн лигт хүч үзэхээр Италид бэлтгэлээ хийж буй манай улсын шилдэг тамирчдын нэг З.Энхзориг Гуанжугийн дэвжээнд тоглохыг хүсч буйгаа илэрхийлжээ. Басхүү дэлхийн лиг хэдий хугцаанд болохоос шалтгаалж 75 кг-ын жинд Т.Чулуунтөмөр, Л.Шинэтулгын хэн нь тоглох эсцийн шийдвэр гараагүй байна. Ямартаа ч  оюутны ДАШТ-д оролцсон багийн 70 орчим хувь нь Азийн наадамд өрсөлдөх юм.

Үндэсний шигшээ баг энэ сарын 29-нд Наньжинд очиж хамтарсан бэлтгэл хийгээд Гуанжуг зорино. Энэ үеэр шигшээ багийн эцсийн бүрэлдэхүүн тодрох бөгөөд тэмцээн болох газрын уур амьсгалд дасах боломж юм.