МҮБХ, Хэнтий аймгийн БТСГ хамтран энэ сарын 19-20-нд Өндөрхаан хотод үндэсний бөх тайлбарлагч­дын нээлттэй уралдааныг зохион байгуулах гэж байна. Уралдааны гол зорилго нь тайлбарлагчдын мэргэжлийн ур чадварыг нэмэгдүүлэх, харилцан туршлага солилцуулах, авьяас, ур чадварыг олон нийтэд сурталчлах, залгамж халааг төрүүлэх, өсвөр насны хүүхдүүдэд үндэсний бөхийн түүх, соёл ёс жаягийг таниулах аж. Энэхүү уралдаан зургаан үе шаттай болох бөгөөд оролцогчид үндэсний бөхийн түүх, ёс жаягийн талаарх мэдлэг, хоолойн өнгө, бөх тайлбарлалт, барилдааны тайлбар, үндэсний бөхийн мэхний мэдлэгийн түвшин, бөхийн цол дуудах, үзэгчдийг байлдан дагуулах авьяас чадвар зэрэг үзүүлэлтээр өрсөлдөх юм байна. Тэргүүн байрт шалгарсан бөх тайлбарлагчийг сая төгрөгөөр шагнах уралдааныг Хэнтий аймгийн Үндэсний бөхийн холбооноос томилогдсон шүүгчдийн бүрэлдэхүүн шүүн явуулах юм.