Челси хэсгийн 4 дэх ялалтаа Спартакаар авч хасагдах шатанд шалгарлаа. 2 долоо хоногийн өмнө Спартакын талбайд тэд 2 : 0-ээр ялж байсан бол тэд энэ удаа 4 : 1-ээр өрсөлдөгчөө бутниргэжээ. Эхний хагас гоолгүй өндөрлөсний дараа Николас Анелка тооны харьцааг нээсэн. Улмаар Дрогба торгуулийн цохилтоос гоол оруулан Бранислав Иванович 2 гоол дараалан оруулсан.Франк Лампард эргэн ирэх болоогүй учраас Рамирес төвийн хагас хамгаалалтад гарсан байлаа. Багийн ахлагч Жон Терри Ливерпультэй хийх чухал тоглолтод нөөгдсөн тул Алекс-Ивановичийн төвийн хослол гараанд гарчээ. Карло энэ тулаанд Дрогба, Анелка, Калу гэсэн хүчирхэг довтолгоонтой бүрэлдэхүүн сонгосон байсан нь үр дүнгээ өгсөн. Петр Чех энэ үдэш бас л завгүй байж эсрэг багийн 4 цохилтыг хаасан юм. Аваргуудын лигийн шинэ улирал эхлээд Чех 16 цохилтыг хаагаад байгаа нь дээгүүр орох үзүүлэлт.

Эхний хагаст Челсигийнхэн талбайдаа тоглож байгаагийн хэргээ гаргаж олон аюултай довтолгооноор өрсөлдөгчөө сандаргаж байлаа. Харин Спартакын хувьд гоол оруулах хамгийн сайхан боломж 32 дахь минутад олдсон. Оросын багийн ахлагч Алексын цохилт хаалганы доод буланг чиглэж байсан ч Чех эцсийн мөчид гар хүрч хаалганаасаа холдуулсан. Ийнхүү эхний хагас сонирхолтой өрсөлдөөнтэй байсан ч гоолгүй өндөрлөсөн. Харин 49  дэх минутад Соломон Калугийн баараггүй дамжуулалтыг тэрээр хаалганд чихэж улирлын 10 дахь гоолоо, аваргуудын лигт 5 дахь гоолоо орууллаа. Анелка аваргуудын лигт гараанд гарсан сүүлийн 8 тоглолтоо 7 гоол оруулаад байгаа юм. Евгений Макеев 61 дэх минутад Дрогбаг 16-гийн талбайд алдаа гарган унагааж торгуулийн цохилтыг Челси авсан. Ингээд ”хохирогч” Дрогба өөрөө цохилтыг баруун талын доод буланд хийж тооны харьцааг холдуулсан.

Энэ гоолоос 4 минутын дараа Дрогбагийн чөлөөт цохилтыг Иванович мөргөж 3 : 0 болгосон. Багийнхаа ялагдалд ундууцсан Спартакын фен талбайд гарч ирэн үймээн дэгдээсэн ч удалгүй хамгаалагчдад баригдан талбайг орхилоо. 86  дахь минутад сэлгээгээр орж ирсэн Спартакын Никита Баженов гоолдож нэр төрийн гоолыг Оросуудад авчирлаа. Ингээд 90+2 дахь минутад Иванович тоглолтын эцсийн цэгийг тавьж 2 дахь гоолоо оруулсан юм.