Монгол Улсын Ерөнхийлөгчийн ивээл дорх футзалны “Дуулиан-2020” тэмцээний ивээн тэтгэгчдийн дундах тэмцээн УБДС-ийн зааланд боллоо. Ирээдүйн хөлбөмбөгчдийг дэмжиж, нийгмийн хариуцлагаа хэрэгжүүлж буй спонсор байгууллагуудын долоо дахь тэмцээнийг уламжлал ёсоор “Их талын дуулиан” ТББ зохион байгуулсан бөгөөд 14 баг өрсөлдсөнөөс “Бумо“ дэлгүүрийн хамт олон тэргүүлж, 500 мянган төгрөгийн эзэн болжээ. Харин мөнгө, хүрэл медаль хүртсэн “Дельта”, “Хас” банк 400, 300 мянган төгрөг халаасласан байна. Тэмцээний цэвэр тоглолттой багаар “Саммит” компьютер технологийн компанийн хөлбөмбөгчид шалгарсан бол шилдэг довтлогчоор 14 гоолтой А.Тамир /Дельта/, хаалгачаар Д.Гэрэлсүрэн /Хас/, тоглогчоор Б.Маргад /Бумо/ нар тодорчээ. “Дуулиан-2020”-ийн ивээн тэтгэгчдийн тэмцээн жилдээ хоёр удаа, хавар, намар болдог юм.