Азийн наадмын эхний өдөр Монголын баг триатлоны төрлөөр салхиа хагалсан бол медалийн салхийг хагалах өндөр магадлалтай жүдочид гараагаа тун тааруу эхэллээ. Хамгийн түрүүнд дэвжээнд гарсан гавьяат тамирчин Д.Цэрэнханд Казахстаны Гулжан Иссановагийн эсрэг төдийлэн идэвх гаргалгүй барилдсаар, сүүлийн минутад хоёр торгууль хүлээн хожигдсон бол +100 кг-д Б.Сугаржаргал Ираны Мохамад Реза Родакид нүд ирмэхийн зуур л цэвэр буулаа. Үүний дараа -78 кг-д П.Лхамдэгд Галина Улментаеваг юүкогоор хожиж яваад дийлдэж орхисон. Шийдэмгий биш хутгаа хийснийг казах бүсгүй мордоогоор хариулж, иппон үнэлгээ авсан юм.

Манай хоёр бүсгүйгийн хувьд дор хаяж хүрэл медаль авах боломж байлаа. Эхний тойрогт таарсан тооцоонд ороогүй казах жүдочдод хожигдоогүй бол тэд хэсгийн аваргын төлөө барилдаанд ялагдлаа гэхэд хүрлийн төлөө гар амар барилдах байв. Филиппин, Кыргызийн бөхчүүдийн ялсантай нь хүрэл медаль авах эсэхээ шийдэх барилдаан хийх байсан П.Лхамдэгд одоо олимпийн аварга Ян Сьюли, олимп, ДАШТ-ий хүрэл медальт Жён Гён-Ми хоёрын хожигдсоныг нь ялах хүнд даалгавартай боллоо. Д.Цэрэнханд гавьяат ч гэсэн Тайланд, Тайванийн жүдочдын нэгтэй нь медаль булаацалдах байсан бол одоо дэлхийн хошой аварга Мика Сүгимото, гурван удаа таараад нэг ч хожиж байгаагүй Ким На-Ён нарын ялагдсантай нь хүрлийн төлөө барилдах юм.

Олимпийн аварга Н.Түвшинбаярын зодоглосон -100 кг-д хамгийн олон аваргууд хүч үзжээ. Энэ жилийн дэлхийн аварга Такамаса Анаи энэ жингийн тэргүүн бөхөөр Гуанжоуд газардсан бол 2003 онд 90 кгд түрүүлж байсан Хван Хи-Тэ, 2009 оны дэлхийн аварга Максим Раков нар мөн иржээ.

Манай бөхтэй эхний тойрогт хүч үзэх байсан Зафар Мадаминов жингийн үзлэгээр 0,5 кг илүү гарч хасагдсан ба Н.Түвшинбаяр Тажикистаныг Абдурахмановтой эхний барилдаанаа хийсэн. Эхний минутад Түвшээ аварга тохой сөхөж үүрэх дархан мэхээрээ тажик жүдочийг юүко үнэлгээ байж болохоор унагасан ч шүүгчид гараа хөдөлгөсөн ч үгүй. Төдөлгүй аварга дэвжээний захад биеэ сулласныг өрсөлдөгч нь мэдрээд шахаж татан цэвэр буулгасан.