Монголын үндэсний бөхийн холбоо үүсэн байгуулагдсаны 20 жилийн ойд зориулсан улс, аймгийн цолтой хүчит 512 бөхийн барилдаан явагдлаа. Монгол бөхийн өргөөнд 2 өдөр үргэлжилсэн тус барилдаанд Архангай аймгийн Хашаат сумын харьяат, цэргийн хурц арслан Ч.Санжаадамба ес даван түрүүлэв. Тэрээр үзүүр түрүүнд даян аварга Г.Өсөхбаяртай барилдаж, нутгийн ахаа хөмрөх мэхээр өвдөг шороодуулсан.

Ч.Санжаадамба ийнхүү улсын цолтнууд барилдсан дөрвөн барилдаанд дараалан үзүүр түрүүнд үлдэж эр бяр тэгш байгаагаа харууллаа. Тэрээр начин цолтнуудад хүндэтгэл үзүүлэх барилдаан, Бүртгэлийн алба үүсэн байгуулагдсаны 70 жилийн ойд үзүүрлэж Улс тунхагласны ойн барилдаанд түрүүлсэн. Сүүлийн жилүүдэд начин цолд хүрэх бөхчүүдийн тааврыг тогтмол тэргүүлж байгаа Монгол туургатны наадмын аварга Ч.Санжаадамба өнгөрсөн наадмын 4-н даваанд улсын начин Д.Лхагвадоржид өвдөг шороодсон билээ.

Зааланд 512 бөх барилдсан анхны барилдаан энэ болсон бөгөөд шөвгийн дөрөвт Улсын гарьд И.Доржсамбуу, харцага Д.Баасандорж, Ч.Санжаадамба, Г.Өсөхбаяр үлдсэн юм. МҮБХ-ны нарийн бичгийн дарга Б.Цогтбаатар уг барилдааныг улсын наадмаас илүү чанартай барилдаан болно хэмээн ярьж байсан. Улсын наадмаар цол горилж байгаа залуус аймаг цэргийн наадамд барилдаад улсын наадамд зодоглож чаддаггүй бол бол энэ удаа бүх шилдэг хүчтэнүүд барилдсан сайхан барилдаан боллоо.

МҮБХ-ны 20 жилийн ойд зориулсан арга хэмжээ үүгээр дуусахгүй. Өнөөдөр холбооны VI “Их Эе” “Чингис” зочид буудалд хуралдаж байна. Бөхчүүд, бөхийн зүтгэлтнүүдээс бүрдсэн 200 төлөөлөгч энэ хуралд оролцож буй бөгөөд үүнээс өмнө 12 сарын 3-нд “Хийморь далласан аялгуу” нэртэй бөхчүүд, урлагын оддын оролцсон тоглолтыг зохион байгуулсан юм.