Монголын волейболын холбооны үндэсний лигийн тэмцээн өнгөрсөн оны аравдугаар сарын 23-нд эхэлсэн билээ. Лигийн нэг, хоёрдугаар тойргийн тоглолт болсны эцэст арваннэгдүгээр сарын 3-нд завсарласан. Учир нь Монгол Улсын эрэгтэй, эмэгтэй шигшээ баг өнгөрсөн саруудад “Гуанжоу-2010” Азийн наадам болон Зүүн Азийн аварга шалгаруулах тэмцээнд оролцоод ирсэн. Харин лигийн гуравдугаар тойргийн тоглолт маргааш эхлэхээр болжээ. Энэ удаагийн лигт эрэгтэй тав, эмэгтэй дөрвөн баг өрсөлдөж байгаа. Гурван тойргийн эцэст хамгийн өндөр үзүүлэлттэй хоёр баг алт, удаах хоёр баг хүрэл медалийн төлөө өрсөлдөх юм.