Нийслэлийн БТСГ, Монголд байгаа орос сургуулиудын холбоо хамтран Ах дүү хотуудын сагсан бөмбөгийн аварга шалгаруулах өсвөрийн тэмцээнийг жил бүр зохион байгуулдаг билээ. Энэхүү тэмцээнд ОХУ-ын хилийн дагуу хотууд оролцдог тул Ах дүү хотуудын хэмээн нэрлэдэг аж. МУБИС-ийн харьяа БТСДС-ийн зааланд үргэлжилж буй долоо дахь удаагийн тэмцээн хөвгүүдийн дөрвөн насны ангилалд болж байгаа. Монголын өсвөрийн сагсан бөмбөгчдийн ур чадварыг дээшлүүлэх, туршлага судлуулах зорилготой тэмцээнд нийслэлийн болон Налайх, Багануур дүүрэг, Эрдэнэт хот, Хялгант тосгон, ОХУ-ын Эрхүү, Ангарск хотын 54 багийн 400 гаруй өсвөрийн тамирчин өрсөлдөж байна. Харин Чита, Улаан-Үдийн баг хүрэлэн ирж чадаагүй ажээ. Тэмцээний аваргууд энэ сарын 7-нд тодорно.