TLG-13 ТББ, “MCS  Кока кола” компанитай хамтран зохион байгуулдаг сонирхогчдын сагсан бөмбөгийн Спрайт D лигийн бүсийн аваргын төлөөх тоглолтууд өнгөрөгч амралтын өдрүүдэд явагдлаа. Энэхүү тэмцээн шинээр ашиглалтад орсон Яамагийн спорт цогцолборт болсон байна.

Өнгөрөгч 11 сард эхэлсэн Спрайт D лигийн тэмцээн МУБИС-ийн харъяа БТДС-ийн спорт зааланд болж байсан бол өнгөрөгч амралтын өдрүүдэд Яамагийн спорт цогцолборт зүүн баруун бүсийн аваргуудаа тодруулсан байна. Баруун бүсийн аваргын төлөө плей-оффын нэгдүгээр байраар шалгарсан Цагдаагийн Академийн баг, Эрдэнэдрийлинг компанийн багтай таарч эхний тоглолтдоо хожоод байсан бол хоёр дахь тоглолтдоо 81:63-аар давамгайлсанаар Спрайт Ди лигийн финалд шалгараад байна. Тэд плей-оффт нэг ч ялагдал хүлээлгүй шигшээ тоглолтод шалгарч байгаа юм. Харин зүүн бүсийн аваргын төлөө тунан үлдсэн Нью-Арена, Улаанбаатар дээд сургуулийн багуудын эхний тоглолтод Улаанбаатар дээд сургууль хожоод байсан бол хариу тоглолтод Нью-Арена 73:60-аар хожин хожлын харьцааг тэнцүүлсэн байна. Харин шийдвэрлэх гурав дахь тоглолтод Улаанбаатар дээд сургуулийн баг 67:62-оор хожсоноор бүсийнхээ аваргаар тодорч, шигшээ тоглолтод Цагдаагийн Академийн эсрэг тоглох эрхтэй болсон. Спрайт Ди лигийн финалын тоглолт мөн ирэх амралтын өдрүүдэд Яармагийн спорт цогцолборт явагдах юм байна.